د امریکا ولسمشر ډونالډ ټرمپ ویلي، د هرمز تنګی به ژر پرانیستل شي او خبرداری یې ورکړی چې که داسې ونه شي، د ایران اسلامي جمهوریت به له «ډېر سخت ګوزار» سره مخ شي.
ټرمپ له فاکس نیوز شبکې سره په مرکه کې ادعا وکړه چې امریکا د ایران پر ضد د دویمې نړیوالې جګړې راهیسې د تر ټولو لوی برید د ترسره کولو په درشل کې وه، خو د هغه په وینا، ایراني چارواکو د عملیاتو له پیل مخکې د خبرو غوښتنه وکړه او له همدې امله دغه عملیات وځنډول شول.
د امریکا ولسمشر یو ځل بیا ټینګار وکړ چې د واشنګټن اساسي هدف د ایران د اټومي وسلو د ترلاسه کولو مخنیوی دی. هغه ادعا وکړه، که تهران دې وړتیا ته رسېدلی وای، نړۍ به له بشپړاً بل وضعیت سره مخ شوې وای.
د دغې مرکې له خپرېدو څو ساعته وروسته، د ایران دولتي رسنیو، د صداوسیما په ګډون، د یوه «باخبره چارواکي» له قوله راپور ورکړ چې تر هغه وخته چې د ډونالډ ټرمپ ګواښونه دوام ولري، د ایران او عمان ترمنځ د هرمز تنګي د بیا پرانیستې په اړه هر ډول احتمالي تفاهم به وځنډول شي.
ایراني چارواکو تر اوسه په رسمي ډول د ټرمپ د څرګندونو په اړه مستقیم غبرګون نه دی خپور کړی.
