خالده بوفدش، چې د الجزایر د ملي آزادۍ جبهې د ګوند د مرکزي کمېټې غړې ده، د استازو د رایو په ترلاسه کولو سره د دغه هېواد د پارلمان مشرې وټاکل شوه او د الجزایر د پارلمان په تاریخ کې یې د لومړۍ ښځې په توګه دغه مقام خپل کړ.
د الجزایري رسنیو د راپورونو له مخې، خالده بوفدش د چهارشنبې په ورځ د رایې ورکولو له بهیر وروسته د پارلمان د مشرې په توګه وټاکل شوه. نوموړې د الرژۍ ناروغیو متخصصه ده او د پلازمېنې له حوزې څخه پارلمان ته لار موندلې ده.
د ملي آزادۍ جبهه ګوند، چې د الجزایر د خپلواکۍ په مبارزه کې مهم رول لوبولی او اوس د حکومت له اصلي متحدانو څخه ګڼل کېږي، په وروستیو پارلماني ټاکنو کې د ۴۰۷ څوکیو له ډلې لږ تر لږه ۹۱ څوکۍ وګټلې او د پارلمان تر ټولو لویه ډله یې جوړه کړه.
وروستۍ پارلماني ټاکنې د شاوخوا ۲۱ سلنه واجدو رأیه ورکوونکو په ګډون ترسره شوې، چې د الجزایر د پارلماني ټاکنو په تاریخ کې د ګډون تر ټولو ټیټه کچه بلل شوې ده.
خالده بوفدش تر پارلمان مخکې په سیمهییز سیاست کې فعاله وه او اوس د خپل ګوند له مخکښو څېرو څخه د پارلمان مشرتابه ته رسېدلې ده.
د نوموړې ټاکنه په داسې حال کې شوې چې د الجزایر په پارلمان کې د ښځو استازیتوب د پام وړ کم شوی دی. اوس مهال یوازې ۲۵ ښځې، چې د پارلمان شاوخوا شپږ سلنه څوکۍ جوړوي، استازیتوب کوي؛ په داسې حال کې چې په مخکینۍ دوره کې دا شمېر ۳۸ او تر هغې وړاندې ۱۱۸ تنه و.
د څارونکو په وینا، دا کمښت د ټاکنیز قانون له بدلون او د جنسیتي ونډې د سیستم له لغوه کېدو وروسته رامنځته شوی؛ هغه سیستم چې مخکې یې پارلمان ته د ښځو د پراخ حضور زمینه برابره کړې وه.
