د هند دفاع وزیر راجنات سینګ ویلي، نوی ډیلي له پاکستان سره د خبرو هېڅ پلان نه لري او که په راتلونکي کې د دواړو هېوادونو ترمنځ مذاکرات ترسره شي، نو یوازې به د پاکستان تر ولکې لاندې د کشمیر په اړه وي.
سینګ د کارګیل جګړې د بریا د اووه ویشتمې کلیزې په مراسمو کې یو ځل بیا ادعا وکړه چې کشمیر د هند خاوره ده چې د پاکستان له خوا «اشغال» شوې ده. هغه د ۱۹۹۹ کال د کارګیل جګړه نه یوازې پوځي بریا، بلکې د هند لپاره ډیپلوماټیکه بریا هم وبلله.
د هند دفاع وزیر پر پاکستان سختې نیوکې وکړې او دغه هېواد یې د ترهګرۍ په ملاتړ تورن کړ. نوموړي ادعا وکړه چې هند پر اقتصادي ودې، ټکنالوژۍ، نوښت، فضايي پروګرامونو او د نیمههادي صنعت پر پراختیا تمرکز کړی، په داسې حال کې چې پاکستان د ده په وینا د نیابتي جګړو او ترهګرۍ ملاتړ ته دوام ورکوي.
هغه خبرداری ورکړ چې که پاکستان د هند پر ضد کوم اقدام وکړي، د هند وسلهوال ځواکونه به «له تصور پورته» ځواب ورکړي.
په مقابل کې، د پاکستان د بهرنیو چارو وزارت د یوې اعلامیې په خپرولو سره د سینګ څرګندونې «پارونکې» او «غیرمسؤلانه» وبللې. اسلاماباد ویلي، دا دریځونه د کشمیر په اړه د ملګرو ملتونو د امنیت شورا له پرېکړهلیکونو سره په ټکر کې دي او د سیمې سوله او امنیت له خطر سره مخ کوي.
کشمیر د ۱۹۴۷ کال راهیسې، د برتانوي هند له وېش وروسته، د هند او پاکستان ترمنځ د لانجې موضوع پاتې شوې ده. دواړه هېوادونه پر ټول کشمیر د حاکمیت ادعا لري، خو هر یو یې د سیمې یوه برخه تر خپل کنټرول لاندې لري. دغه شخړه په تېرو لسیزو کې څو جګړو، د ۱۹۹۹ کال د کارګیل جګړې او د سویلي اسیا د دغو دوو اټومي ځواکمنو هېوادونو ترمنځ پرلهپسې کړکېچونو ته لاره هواره کړې ده.
