په فرانسه او هسپانیه کې پراخې ځنګلي اورلګېدنې لا هم دوام لري او د دواړو هېوادونو چارواکو د اور د مهارولو او د خلکو د خوندیتوب لپاره پراخ عملیات پیل کړي دي.
د فرانسې په سوېل لوېدیځ کې د بوردو ښار ته نږدې، د آرکاشون حوضې په شمال کې، د جولای په ۲۲مه پیل شوې سختې اورلګېدنې لږ تر لږه ۹۰۰ هکټاره ځنګلونه او طبیعي نباتات سوځولي او اور لا هم د پراخېدو په حال کې دی. د اور د چټک پرمختګ له امله زرګونه اوسېدونکي او سیلانیان له خطرناکو سیمو ایستل شوي دي.
په همدې وخت کې، د هسپانیې د مادرید په سیمه کې هم نوې ځنګلي اورلګېدنه رامنځته شوې ده. هسپانوي چارواکو د اور د پراخېدو د مخنیوي لپاره د څو استوګنیزو سیمو د تخلیې امر کړی او یو ښارګوټی یې تر ځانګړو محدودیتونو لاندې راوستی ترڅو د خلکو تګ راتګ محدود شي.
ځايي چارواکي او د اوروژنې ځواکونه په دواړو هېوادونو کې د اور د کنټرول لپاره هڅې روانې ساتي. د چارواکو په وینا، سخته ګرمي، د هوا وچوالی او د بادونو چټک جریان د اور د ژر خپرېدو اصلي عوامل دي.
اروپا په وروستیو اوونیو کې د سختې تودوخې له څپې او د ځنګلي اورونو له زیاتوالي سره مخ شوې ده. کارپوهان وایي، د اقلیمي بدلونونو شدت او د تودوخې لوړېدل د دغو طبیعي پېښو د ډېرېدو مهم عوامل ګڼل کېږي.
