د بریتانیا چارواکو دوه ایراني وګړي د منچسټر د یهودانو پر ټولنې د یوه ادعا شوي ترهګریز برید د چمتو کولو په تړاو تورن کړي دي.
د بریتانیا د څارنوالۍ ادارې ویلي، رحمان صالحی او سلام احمدیان د ترهګریز عمل د ترسره کولو یا د بل کس د مرستې لپاره د چمتووالي په تور محاکمه کېږي. دواړه د سپټمبر په ۲۰مه په منچسټر کې نیول شوي وو.
د بریتانیا د پولیسو په وینا، قضیه د یهودانو ټولنې په نښه کولو د یوې ادعا شوې طرحې په اړه د ترهګرۍ ضد پولیسو د تحقیقاتو پایله ده. دواړه کسان د سپټمبر په ۲۰مه، د یوم کیپور یهودي مذهبي ورځې په درشل کې نیول شوي وو.
د څارنوالۍ ادارې ټینګار کړی چې پر دواړو کسانو لګېدلي تورونه د محکمې له خوا د جرم د ثابتېدو معنا نه لري او هغوی د عادلانه محاکمې حق لري. د جرم په اړه وروستۍ پرېکړه یوازې محکمه کولی شي.
د بریتانیا د لوی منچسټر سیمه ییزو چارواکو ویلي چې د دغې ادعا شوې طرحې له امله د یهودانو په ټولنه کې اندېښنه رامنځته شوې ده. پولیسو ویلي چې د دغې ادعا شوې طرحې له امله اوس مهال د خلکو پر وړاندې د دوامدار ګواښ نښې نه شته.
د قضیې نور جزئیات به د محکمې د بهیر په راتلونکو پړاوونو کې څرګند شي.
