د ترکیې چارواکو اعلان کړی چې د بلغاریا پولې ته نږدې یې ۳۴ افغان کډوال نیولي دي؛ هغه کسان چې د ترکي رسنیو د راپورونو له مخې، د یوه باروړونکي موټر په دننه کې پټ شوي وو او غوښتل یې په ناقانونه توګه اروپا ته ځان ورسوي.
د راپورونو له مخې، دغه کسان د ترکیې د کرکلارلي ولایت په شمال لوېدیځه سیمه کې، چې د بلغاریا پولې ته نږدې موقعیت لري، پېژندل شوي او نیول شوي دي. د ترکیې چارواکو ویلي، ټول نیول شوي کسان له لومړنیو قانوني مراحلو وروسته د کرکلارلي د جبري ستنولو مرکز ته لېږدول شوي دي.
په ترکیه کې مېشت خبریال منیر منصوري ویلي، هغه کسان چې په ترکیه کې د قانوني استوګنې اسناد نه لري، د پېژندل کېدو په صورت کې نیول کېږي، او ډېری یې هڅه کوي د ترکیې له لارې اروپايي هېوادونو ته ولاړ شي. د هغه په وینا، همدا موضوع د دغې ډلې د نیول کېدو اصلي لامل و.
د ترکیې د کډوالۍ ادارې د شمېرو له مخې، د روان میلادي کال په لومړیو شپږو میاشتو کې له ۱۹ زره او ۵۰۰ څخه ډېر افغانان د ترکیې په بېلابېلو سیمو کې نیول شوي دي. د یادو شمېرو پر بنسټ، افغانان لا هم په ترکیه کې د نیول شویو ناقانونه کډوالو تر ټولو لویه ډله جوړوي.
د کډوالو د حقونو فعال محمدخان طالبي د افغانستان له سرپرست حکومت څخه غوښتي چې د نړیوالو قوانینو په چوکاټ کې د افغان کډوالو لپاره قونسلي ملاتړ زیات کړي او د هغوی ستونزې تعقیب کړي.
دا پېښه په داسې حال کې رامنځته شوې چې د افغانستان د وګړو اروپا ته د کډوالۍ بهیر لا هم دوام لري. اقتصادي ستونزې، بېکاري، ټولنیز محدودیتونه او امنیتي اندېښنې هغه مهم عوامل بلل کېږي چې ګڼ افغانان د هېواد پرېښودو او د خطرناکو کډوالۍ لارو د انتخاب لور ته هڅوي.
تر دې وړاندې د کډوالو د ستونزو د ارزونې کمېسیون هم ویلي وو چې د حمل په میاشت کې شاوخوا دوه زره او ۵۰۰ افغان بندیان د ایران او پاکستان له زندانونو ازاد او افغانستان ته ستانه شوي وو.
