په کراچۍ کې د طالبانو سرقونسل عبدالجبار تخاري ویلي، د پاکستان د سند ایالت د افغان محصلانو د ویزو اعتبار پای ته رسېدلی، خو تر اوسه له جدي ستونزو سره نه دي مخ شوي. نوموړي خبرداری ورکړی چې په نورو ایالتونو کې افغان محصلان د معتبرې ویزې د نشتوالي له امله د نیولو او ایستلو له خطر سره مخ دي.
تخاري د چهارشنبې په ورځ، د چنګاښ په ۲۴مه، په یوه ویډیويي پیغام کې وویل چې د پاکستان حکومت تر اوسه د سند ایالت د افغان محصلانو د ویزو د تمدید بهیر نه دی پیل کړی.
دغه څرګندونې داسې مهال کېږي چې د پاکستان د کورنیو چارو وزارت مخکې امر کړی و، د چنګاښ له ۱۹مې نېټې وروسته دې ټول هغه افغان وګړي ونیول شي چې معتبره ویزه نه لري.
باوري سرچینې وایي، پاکستاني امنیتي ځواکونو په وروستیو کلونو کې د افغان کډوالو، په ځانګړي ډول د محصلانو او خبریالانو، د نیولو او ایستلو بهیر چټک کړی دی. د یوې سرچینې په وینا، یو شمېر افغان خبریالان او محصلان چې د استوګنې قانوني اسناد نه لري، اوس هم په اسلاماباد کې په توقیف کې دي.
هممهاله، سرچینو افغانستان انټرنشنل ته ویلي چې د پاکستان پولیسو د پنجاب ایالت په ملتان ښار کې ۱۳ افغان ډاکټران او یو د طب محصل نیولي او د ایستلو مرکز ته یې لېږدولي دي.
د معلوماتو له مخې، دغو کسانو شاوخوا یو کال مخکې د خپلو ویزو د تمدید غوښتنې ثبت کړې وې، خو تر اوسه یې د پاکستاني چارواکو له لوري هېڅ ځواب نه دی ترلاسه کړی.
د افغان کډوالو د نیولو او ایستلو د لړۍ پراخېدو د محصلانو، متخصصانو او د هغوی د کورنیو اندېښنې زیاتې کړې او په پاکستان کې یې د زرګونو افغانانو د راتلونکي په اړه لا ډېرې پوښتنې راپورته کړې دي.
