د امریکا مرکزي قوماندانۍ (سینټکام) اعلان کړی چې امریکايي ځواکونو د چهارشنبې په سهار، د چنګاښ په ۱۷مه، په ایران کې د یو شمېر هدفونو پر ضد پوځي عملیات پیل کړي دي. د امریکا پوځ وایي، دا بریدونه هغو حملو ته ځواب دی چې واشنګټن یې د هرمز تنګي له لارې پر درېیو سوداګریزو بېړیو د ایران له لوري ترسره شوي بولي.
سینټکام په اېکس ټولنیزه شبکه کې په خپره کړې خبرپاڼه کې ویلي: «د امریکا د مرکزي قوماندانۍ ځواکونو د ایران پر ضد ځواکمن عملیات پیل کړي، څو د نړیوالې اوبو لارې کې پر ملکي عملې لرونکو سوداګریزو بېړیو د بریدونو دروند قیمت پرې کړي.»
د امریکا پوځ ادعا کړې چې د ایران له لوري پر سوداګریزو بېړیو بریدونه «بېدلیله، خطرناک او د اوربند ښکاره سرغړونه» ده، او ویلي یې دي چې روان عملیات د همدې اقداماتو په ځواب کې ترسره شوي دي.
په ورته وخت کې، د ایران دولتي رسنیو، د صدا او سیما په ګډون، راپور ورکړی چې د چهارشنبې د سهار په لومړیو ساعتونو کې د سیریک ولسوالۍ، د قشم ټاپو او بندرعباس په ځینو برخو کې د څو چاودنو غږونه اورېدل شوي دي، خو د دغو چاودنو د لامل، دقیقو هدفونو او احتمالي زیانونو په اړه یې نور معلومات نه دي خپاره کړي.
تر دې دمه ایراني چارواکو د سینټکام د خبرپاڼې په اړه رسمي غبرګون نه دی ښودلی. تهران تر دې وړاندې هم د هرمز تنګي پر سوداګریزو بېړیو د هغو بریدونو مسؤلیت نه و منلی چې امریکا یې ایران ته منسوبوي.
د امریکا او ایران ترمنځ وروستي پوځي تحرکات په داسې حال کې رامنځته کېږي چې د دواړو هېوادونو ترمنځ ترینګلتیا په بېساري ډول زیاته شوې ده. شنونکي باور لري، که دا وضعیت دوام ومومي، نه یوازې د سیمې امنیت، بلکې د نړیوالې کښتۍ چلونې او د انرژۍ نړیوال بازارونه هم له جدي خطرونو سره مخ کېدای شي.
