د امریکا د بهرنیو چارو وزیر مارکو روبیو اعلان کړی چې د امریکا، اسرائیل او لبنان ترمنځ د یوې درېاړخیزې هوکړې چوکاټ لاسلیک شوی دی. د دې چوکاټ له مخې، د اسرائیل پوځ به د سویلي لبنان له هغو سیمو څخه چې اوس یې تر کنټرول لاندې دي، په تدریجي ډول ووځي او د لبنان پوځ به په دغو سیمو کې ځای پر ځای شي.
د روبیو په وینا، په دې چوکاټ کې د راتلونکي سولې د هوکړې لپاره د لارې نقشه هم شامله ده او ترڅنګ یې هغه بېړني اقدامات هم مشخص شوي چې دواړه لوري یې باید په عملي ډګر کې ترسره کړي.
اکسیوس خبري شبکې دغه پرمختګ یو مهم دیپلوماتیک ګام بللی، خو ټینګار یې کړی چې تر هغه وخته چې حزبالله لا هم وسلهوال او په لبنان کې اغېزمن وي، د هوکړې بشپړ عملي کېدل به له ننګونو او ابهام سره مخ وي.
که دا هوکړه عملي شي، دا به لومړی ځل وي چې د اسرائیل پوځ له هغو سیمو څخه شاتګ کوي چې د سویلي لبنان د پوځي عملیاتو او له ایران سره د وروستۍ جګړې وروسته یې نیولې وې.
دا پرمختګ داسې مهال رامنځته کېږي چې د اسرائیل او حزبالله ترمنځ نازک اوربند، چې له تېرې اوونۍ راهیسې نافذ شوی، څو ځله نقض شوی دی. اسرائیل ویلي چې وروستي بریدونه یې د حزبالله له لوري د سمدستي ګواښونو په غبرګون کې ترسره کړي دي.
یوه امریکايي چارواکي اکسیوس ته ویلي چې مارکو روبیو د پنجشنبې په ورځ له بنیامین نتانیاهو، د اسرائیل له لومړي وزیر، او د لبنان له ولسمشر ژوزف عون سره په جلا ټیلیفوني خبرو کې د هوکړې وروستي اختلافات حل کړي دي.
