ملاله یوسفزۍ، د نوبل د سولې جایزې ګټونکې او د نجونو د زده کړو فعاله، بروکسل ته د طالبانو د یوه پلاوي د بلنې په اړه سخت غبرګون ښودلی او ویلي یې دي چې له دې پرېکړې «ژوره خواشینې او حیرانه» شوې ده.
ملالې د دوشنبې په ورځ، د سرطان په لومړۍ نېټه، په اېکس ټولنیزه شبکه کې ولیکل چې غونډې ته بلل شوي کسان د هغې ډلې استازي دي چې د افغانستان نجونې یې له شپږم ټولګي پورته زده کړو څخه محرومې کړې او پر ښځو یې پراخ محدودیتونه لګولي دي.
هغې د هرات وروستیو پېښو ته په اشارې سره وویل چې طالبانو په وروستیو اوونیو کې لسګونه ښځې د هغوی د پوښاک له امله نیولې دي.
ملالې همدارنګه لیکلي: «دا هماغه طالبان دي چې ښځې یې د خبرو کولو یا د خپلو مقرراتو د نه منلو له امله نیولې، وهلې او شکنجه کړې دي.»
اروپایي کمېسیون اعلان کړی چې د طالبانو یو پلاوی یې بروکسل ته د تخنیکي خبرو لپاره وربللی دی. ټاکل شوې په دې خبرو کې د هغو افغان کډوالو د بېرته ستنولو موضوع وڅېړل شي چې په جرمونو محکوم شوي یا یې د پناه غوښتنې دوسیې رد شوې دي.
اروپایي چارواکو ټینګار کړی چې دا خبرې یوازې تخنیکي بڼه لري او د افغانستان د قانوني حکومت په توګه د طالبانو د رسمیت پېژندنې معنا نه لري.
سره له دې، بروکسل ته د طالب استازو بلنې د مدني فعالانو، بشري حقونو د بنسټونو، افغان ښځو او یو شمېر اروپایي سیاستوالو پراخ غبرګونونه راپارولي دي.
منتقدان وایي چې په رسمي اروپایي غونډو کې د طالبانو ګډون ښایي د دغې ډلې د سیاسي مشروعیت په توګه تعبیر شي، په داسې حال کې چې د ښځو، نجونو او منتقدانو پر وړاندې محدودیتونه لا هم دوام لري.
ټاکل شوې دغه غونډه د سې شنبې په ورځ په بروکسل کې ترسره شي او اصلي تمرکز به یې له اروپایي هېوادونو څخه د افغان کډوالو د بېرته ستنولو پر موضوع وي.
