د اسرائیل د ۱۲م تلویزیوني کانال د راپور له مخې، د دغه هېواد لومړي وزیر بنیامین نتانیاهو پوځ ته امر کړی چې په لبنان کې روان پوځي عملیات ودروي او د اوربند له شرایطو سره سم عمل وکړي.
خو د اسرائیل پوځ اعلان کړی چې د لبنان په جنوب کې به له هغو سیمو څخه شاتګ ونه کړي چې اوس یې تر کنټرول لاندې دي او د هر ډول ګواښ یا برید په صورت کې به ځوابي اقدام وکړي.
د اسرائیل حکومت تر اوسه په رسمي ډول د یاد راپور په اړه څه نه دي ویلي.
بل لور ته، جروزالم پوسټ ورځپاڼې راپور ورکړی چې اسرائیل او حزبالله د اوربند هوکړې ته رسېدلي او یوه اسرائیلي سرچینه یې هم تاییدوي.
سره له دې، د اوربند له عملي کېدو یوازې څو ساعته وروسته د لبنان په جنوب کې تازه بریدونو لږ تر لږه ۱۶ کسان وژلي دي. اسرائیل وایي دغه بریدونه د حزبالله له لوري د ډزو په ځواب کې ترسره شوي دي.
د لبنان ملي خبري اژانس هم خبر ورکړی چې اسرائیلي جنګي الوتکو او بېپیلوټه الوتکو د لبنان په جنوب او بقاع درې کې پر څو سیمو بریدونه کړي دي.
د اسرائیل پوځ ویلي چې د حزبالله بریدونه د اوربند ښکاره سرغړونه ده او پوځ د سیاسي مشرانو د لارښوونو له مخې اوربند ته ژمن دی، خو د خپلو ځواکونو او ملکیانو پر وړاندې د هر ډول برید ځواب به ورکړي.
په مقابل کې، حزبالله هم ویلي چې اوربند ته ژمن دی، خو که اسرائیل د خپل پوځي حضور د پراخولو یا د نورو سیمو د نیولو هڅه وکړي، دوی به غبرګون وښيي.
د لبنان د روغتیا وزارت د معلوماتو له مخې، د مارچ له دویمې نېټې راهیسې نږدې څلور زره کسان، چې ماشومان او د ژغورنې کارکوونکي هم پکې شامل دي، د اسرائیلي بریدونو له امله وژل شوي دي.
اسرائیلي چارواکي بیا وایي چې په همدې موده کې ۳۲ اسرائیلي سرتېري او څلور ملکیان وژل شوي دي.
د امریکا او ایران د وروستي تفاهم له مخې، په لبنان کې د عملیاتو په ګډون باید په ټولو جبهاتو کې پوځي فعالیتونه سمدستي او دایمي ودرول شي.
د نیمروز له نظره، که څه هم د اوربند اعلان د تاوتریخوالي د کمېدو لپاره یو مهم ګام ګڼل کېږي، خو وروستۍ نښتې ښيي چې د دې هوکړې ثبات لا هم له جدي ننګونو سره مخ دی.
