لېنډزي ګراهام، د امریکا جمهوريغوښتونکي سناتور، د هرمز تنګي د بیا پرانیستل کېدو هرکلی کړی، خو د ایران او امریکا ترمنځ د اعلان شوي توافق د تفسیر په اړه یې اندېښنه څرګنده کړې ده.
هغه د تهران او واشنګټن ترمنځ د تفاهملیک له اعلان وروسته په اېکس ټولنیزه شبکه کې لیکلي چې لا هم اندېښمن دی ښايي د توافق د مفادو په اړه د ایران برداشت له هغه څه سره توپیر ولري چې امریکایي مذاکره کوونکي یې بیانوي.
د جنوبي کارولینا سناتور ویلي چې د مذاکراتو بهیر او د توافق جزئیات به له نږدې تعقیب کړي.
ګراهام ټینګار کړی چې له ایران سره هر ډول اټومي توافق باید د ارزونې او رایې ورکولو لپاره د امریکا کانګرس ته وړاندې شي.
هغه زیاته کړې چې د توافق د وروستي متن د لیدلو په تمه دی او باور لري چې د امریکا مرستیال ولسمشر جيډي ونس او د مذاکره کوونکي پلاوي نور غړي باید د کانګرس لپاره د توافق د تشریح او وړاندې کولو په بهیر کې مستقیم رول ولري.
ګراهام، چې له کلونو راهیسې د ایران په وړاندې د سخت دریځو سیاستونو له ملاتړو څخه ګڼل کېږي، ویلي چې د دې توافق ریښتینې پایلې به یوازې د وخت په تېرېدو سره څرګندې شي.
د نوموړي څرګندونې په داسې حال کې مطرح کېږي چې د ایران او امریکا احتمالي توافق لا هم د واشنګټن په سیاسي کړیو کې بېلابېل غبرګونونه راپارولي او یو شمېر قانون جوړونکي د توافق د مفادو د لا دقیقې ارزونې غوښتنه کوي.
د دې موضوع اهمیت په دې کې دی چې د کانګرس ملاتړ یا مخالفت کولی شي د هر احتمالي توافق د عملي کېدو او دوام پر راتلونکي مهم اغېز ولري.
