د امريکا ولسمشر ډونالډ ټرمپ يو ځل بيا د ايران په اړه توندې څرګندونې کړې او ويلي يې دي چې واشنګټن د تهران له وړانديزونو څخه د احتمالي هوکړې په اړه راضي نه دی.
ټرمپ ادعا کړې چې ايران د «خطر کندې» او سختو شرايطو له امله نړيوال انټرنېټ بېرته فعال کړی دی.
هغه ويلي:
«ايران غواړي تړون وکړي او له دې پرته بله لاره نه لري.»
د امريکا ولسمشر همدارنګه ويلي چې تهران فکر کوي نوموړی د امريکا د منځمهالو ټاکنو له امله غواړي جګړه پای ته ورسوي، خو د هغه په وينا دا موضوع د ده پر پرېکړو هېڅ اغېز نه لري.
ټرمپ زياته کړې:
«تر اوسه مو له ايران سره کوم تړون نه دی ترلاسه کړی او زه له دې وضعيت څخه خوښ نه يم.»
هغه خبرداری ورکړی چې کېدای شي امريکا اړ شي «بېرته لاړه شي او له ايران سره کار يو مخيزه پای ته ورسوي»، خو ويلي يې دي چې وروستۍ پرېکړه لا نه ده شوې.
ټرمپ د ايران اوسنی وضعيت بحراني بللی او ادعا يې کړې چې اسلامي جمهوريت په داسې حال کې خبرې اترې کوي چې «د سقوط پر درشل» ولاړ دی.
د ټرمپ تازه څرګندونې داسې مهال مطرح کېږي چې په وروستيو ورځو کې د تهران او واشنګټن ترمنځ د هوکړې د ترلاسه کولو لپاره د ډيپلوماټيکو هڅو او خبرو اترو د دوام راپورونه خپاره شوي دي.
