آلمان او فرانسه د اټومي بازدارندګۍ په برخه کې د نږدې همکارۍ لپاره رسمي خبرې اترې پیل کړې دي؛ داسې اقدام چې د اروپا د دفاعي همکاریو په تاریخ کې د نوي فصل پیل بلل کېږي.
د اشپیګل اوونیزې مجلې د راپور له مخې، د آلمان د صدراعظم امنیتي سلاکار ګونتر زاوتر د مې په ۲۷مه پاریس ته سفر کړی او د دغو خبرو اترو په لومړي پړاو کې یې ګډون کړی دی.
د راپورونو له مخې، په دغو مشورو کې د یو شمېر نورو اروپایي هېوادونو استازي هم شامل وو.
دا مذاکرات د آلمان د صدراعظم فریدریش مرتس او د فرانسې د ولسمشر امانویل مکرون د هغه توافق دوام بلل کېږي چې د مارچ په میاشت کې یې د راتلونکو اټومي همکاریو د ارزونې لپاره د «اټومي رهبرۍ ډله» جوړه کړې وه.
راپورونه ښيي چې دغه ډله د احتمالي بحرانونو پر مهال د ګډو پوځي تمرینونو لپاره هم پلانونه جوړوي.
د پلان له مخې، د آلمان پوځ به وکولای شي د فرانسې د اټومي تمرینونو په متعارف پوځي برخه کې ګډون وکړي او ځینو اړوندو تاسیساتو ته هم لاسرسی ولري.
اشپیګل همدارنګه راپور ورکړی چې د فرانسې په مشهور اټومي پوځي تمرین «پوکر» کې د آلمان لومړنی ګډون د ۲۰۲۶ کال لپاره پلان شوی او ښايي د سپټمبر په میاشت کې ترسره شي.
دا پرمختګونه په داسې حال کې رامنځته کېږي چې اروپایي هېوادونه په وروستیو کلونو کې د امنیتي ګواښونو او نړیوالو سیاسي بدلونونو له امله د خپلو دفاعي او بازدارندګي وړتیاوو د پیاوړتیا هڅې زیاتې کړې دي.
شنونکي باور لري چې د آلمان او فرانسې ترمنځ دا همکاري ښايي د اروپا د ستراتیژیکې خپلواکۍ او ګډ امنیتي سیاست په پیاوړتیا کې مهم رول ولوبوي.
