د لغمان ولایت په قرغیو ولسوالۍ کې د پاکستان څخه د راستنېدونکو افغان کډوالو یوه باروړونکې لارۍ چپه شوې چې له امله یې لږ تر لږه ۱۸ کسانو خپل ژوند له لاسه ورکړی او ۲۹ نور ټپیان شوي دي.
د لغمان د والي ویاند عبدالمالک نیازي ویلي چې دغه پېښه نن سهار د قرغیو ولسوالۍ د سرخکان په سیمه کې رامنځته شوې ده.
د هغه په وینا، په لارۍ کې له پاکستانه راستانه شوي کډوال سپاره وو چې د موټر د چپه کېدو له امله ټولټال ۴۷ کسانو ته مرګژوبله اوښتې ده.
نیازي زیاته کړې چې په وژل شویو کسانو کې ۱۰ ماشومان او ۵ ښځې هم شاملې دي.
د پېښې ټپیان د درملنې لپاره د ننګرهار ولایتي روغتون ته لېږدول شوي دي.
ځايي طالب چارواکو ویلي چې د پېښې د علت او څرنګوالي په اړه څېړنې پیل شوې دي.
افغانستان هر کال د ګڼو خونړیو ترافیکي پېښو شاهد وي. د سړکونو خراب وضعیت، چټک موټر چلول، د وسایطو زیات بار او د موټر چلوونکو بېاحتیاطي د دغو پېښو مهم عوامل بلل کېږي.
دا پېښه په داسې حال کې رامنځته شوې چې په وروستیو میاشتو کې له پاکستانه د افغان کډوالو د جبري راستنېدو لړۍ چټکه شوې او زرګونه کورنۍ د هېواد بېلابېلو سیمو ته ستنې شوې دي.
