د اسرائيلو پوځ اعلان کړی چې د لبنان په جنوب کې يې د صور ښار او شاوخوا سيمو کې د حزب الله پر زېربناوو پراخ بريدونه ترسره کړي دي.
د الجزيرې د راپور له مخې، د اسرائيلي بريدونو له شدت وروسته ګڼ شمېر اوسېدونکو د صور ښار پرېښی او ډېری سيمې تشې شوې دي.
د راپور پر بنسټ، له نيمې شپې راهيسې تر اوسه پورې پر صور ښار او شاوخوا سيمو له دولسو څخه زيات بريدونه شوي دي.
په همدې حال کې، د سره صليب نړيوالې کمېټې په يوه سخت خبرداري کې ويلي چې د اسرائيلو له خوا د ملکيانو د اجباري بې ځایه کېدو امرونه او پر استوګنيزو سيمو او ښاري مرکزونو دوامدار بريدونه د لبنان بشري وضعيت په خطرناک ډول خراب کړی دی.
دغه نهاد خبرداری ورکړی چې د زرګونو ملکيانو ژوند له خطر سره مخ دی او ښايي په راتلونکو ورځو کې وضعيت نور هم خراب شي.
د اسرائيلو پوځ د صور ښار او د زقوق المفدي سيمې اوسېدونکو ته په بېړنيو خبرداري ورکړي او ويلي يې دي چې د حزب الله له خوا د اوربند د تړون د «نقض» له امله به پراخ پوځي عمليات پيل کړي.
اسرائيلي پوځ له ملکيانو غوښتي چې د خپل ژوند د خونديتوب لپاره ژر تر ژره سيمه پرېږدي او د زهراني سيند شمال ته ولېږدېږي.
په دغو خبرداري کې د مشخصو ودانيو او سيمو اوسېدونکو ته امر شوی چې ژر تر ژره خپل کورونه تخليه کړي.
د اسرائيلو لومړي وزير بنيامين نتنياهو تر دې وړاندې ويلي وو چې په لبنان کې به د حزب الله پر ضد بريدونه نور هم زيات شي.
د لبنان په جنوب کې د بريدونو زياتېدو د بشري بحران او د اسرائيلو په شمالي پولو کې د جګړې د پراخېدو اندېښنې زياتې کړې دي.
