د طالبانو د دفاع وزیر محمدیعقوب مجاهد له مسکو څخه تر راستنېدو وروسته ویلي چې د روسیې او طالبانو ترمنځ د پوځي او تخنیکي همکاریو د هوکړې عملي چارې به په راتلونکو ورځو کې پیل شي.
نوموړي د شنبې په ورځ د کابل په هوايي ډګر کې خبریالانو ته وویل چې دا هوکړه دفاعي یا امنیتي تړون نه دی او باید د سیمې هېوادونه پرې اندېښنه ونه لري.
د مجاهد په وینا، د دې توافق اصلي موخه په افغانستان کې د موجودو روسي جوړو شويو وسلو او تجهیزاتو بیارغونه، ترمیم او ساتنه ده.
هغه وویل چې په افغانستان کې ګڼ شمېر روسي هلیکوپټرې، الوتکې او نور پوځي تجهیزات شته چې د ترمیم اړتیا لري او د دغو وسایلو د اغېزمنې استفادې لپاره باید له جوړوونکو هېوادونو سره همکاري وشي.
د طالبانو د دفاع وزیر همدارنګه ویلي چې په راتلونکي کې له امریکا سره هم ورته هوکړې امکان لري، ځکه لا هم په افغانستان کې د امریکا جوړ شوي پوځي تجهیزات پاتې دي.
مجاهد ټینګار وکړ چې افغانستان د هوايي دفاع سیسټم ته اړتیا لري او طالبان به په راتلونکې کې د داسې سیستم د پېرلو او برابرولو په اړه پرېکړه وکړي.
هغه د خپلو خبرو په بله برخه کې د پاکستان سره وروستیو ترینګلتیاوو ته اشاره وکړه او ویې ویل چې له روسیې سره شوې هوکړه اسلاماباد اندېښمن کړی دی.
نوموړي زیاته کړه: «موږ به په نږدې راتلونکې کې هڅه وکړو چې پاکستان نور د افغانستان پر خاورې د برید جرئت ونه کړي.»
دا څرګندونې په داسې حال کې مطرح کېږي چې د طالبانو او پاکستان اړیکې په وروستیو میاشتو کې د سرحدي نښتو، هوايي بریدونو او متقابلو امنیتي تورونو له امله له زیات فشار سره مخ شوې دي.
شنونکي باور لري چې د مسکو او کابل ترمنځ د پوځي همکاریو پراختیا ښايي د سیمې په امنیتي معادلو او د افغانستان په پوځي ظرفیتونو اغېز ولري.
