د امریکا د دفاع وزیر پیت هېګسېت ویلي چې که له ایران سره روانې خبرې اترې ناکامې شي او کومه هوکړه رامنځته نه شي، د امریکا پوځ د پوځي عملیاتو د بیا پیل لپاره بشپړ چمتووالی لري.
هېګسېت د جمعې په ورځ د سنګاپور د شانګري-لا امنیتي غونډې پر مهال وویل: «که اړتیا وي، موږ د عملیاتو د بیا پیل بشپړ توان لرو.»
هغه ټینګار وکړ چې د ډونالډ ټرمپ اداره لا هم ترجیح ورکوي چې د ایران مسئله د دیپلوماسۍ له لارې حل شي، خو پوځي انتخاب لا هم پر مېز پاتې دی.
د امریکا د دفاع وزیر زیاته کړه چې ولسمشر ډونالډ ټرمپ د ایران سره د یوې «غوره هوکړې» تمه لري؛ داسې هوکړه چې د هغه په وینا به تهران اټومي وسلو ته له رسېدو منع کړي.
د هېګسېت څرګندونې په داسې حال کې مطرح کېږي چې په وروستیو اونیو کې د ایران او امریکا ترمنځ د احتمالي مذاکراتو او توافق په اړه اټکلونه زیات شوي دي.
په ورته وخت کې، د دواړو هېوادونو چارواکي د هر ډول احتمالي هوکړې د جزییاتو او شرایطو په اړه بېلابېل دریځونه وړاندې کوي.
ایران تل ټینګار کړی چې اټومي پروګرام یې سولهییز اهداف لري او د اټومي وسلو د ترلاسه کولو هڅې ردوي.
شنونکي باور لري چې د دیپلوماسۍ او پوځي فشار هممهاله کارول د واشنګټن د ستراتیژۍ یوه برخه ده، څو تهران د احتمالي توافق شرایطو ته نږدې کړي.
