د امریکا ولسمشر ډونالډ ټرمپ ویلي چې له ایران سره یوې هوکړې ته رسېدل ترجیح ورکوي، خو ټینګار یې کړی چې ټول انتخابونه لا هم پر مېز موجود دي.
ټرمپ د فاکس نیوز شبکې سره په خبرو کې ادعا کړې چې د تېر کال د دولس ورځنۍ جګړې پر مهال د ایران پر ضد ترسره شویو بریدونو تهران د اټومي وسلو له ترلاسه کولو راګرځولی دی.
هغه همدارنګه ادعا وکړه چې متحده ایالاتو د ایران د پوځي وړتیاوو ځینې مهمې برخې له منځه وړي او درنه ضربه یې پرې وارد کړې ده.
د امریکا ولسمشر زیاته کړه چې واشنګټن په قصدي ډول د ایران ټول پوځي قوماندانان په نښه نه کړل، څو د ۲۰۰۳ کال د عراق د وضعیت په څېر شرایط تکرار نه شي.
په همدې حال کې، د امریکا د ولسمشر مرستیال جي ډي ونس ویلي چې واشنګټن لا هم له ایران سره وروستۍ هوکړې ته نه دی رسېدلی، خو دواړه لوري توافق ته نږدې شوي دي.
ورته مهال، یو شمېر امریکایي سرچینو راپور ورکړی چې تهران او واشنګټن د اوربند د غځولو او په هرمز تنګي کې د کښتۍ چلونې پر محدودیتونو د نرمښت لپاره یوې لومړنۍ هوکړې ته رسېدلي دي.
د راپورونو له مخې، دغه تفاهم لا هم د ډونالډ ټرمپ وروستۍ تایید ته اړتیا لري.
د امریکایي چارواکو څرګندونې داسې مهال مطرح کېږي چې په وروستیو اونیو کې د تهران او واشنګټن ترمنځ د کړکېچ د کمولو لپاره ډیپلوماتیکې هڅې زیاتې شوې دي.
همدارنګه د دواړو هېوادونو ترمنځ د احتمالي نوې هوکړې په اړه اټکلونه او سیاسي بحثونه هم دوام لري.
