واشنګټن پوسټ راپور ورکړی چې د ډونالډ ټرمپ د ادارې چارواکي د هغه د انځور لرونکي ۲۵۰ ډالري بانکنوټ د چاپولو طرحه تعقيبوي.
د راپور له مخې، دغه طرحه د امريکا د جوړېدو د ۲۵۰مې کليزې په مناسبت مطرح شوې ده.
د امريکا اوسني قوانين د ژوندو اشخاصو د انځور چاپول پر رسمي بانکنوټونو منع کوي او د دې ډول طرحې عملي کېدل به د کانګرس تصويب ته اړتيا ولري.
واشنګټن پوسټ ليکلي چې د امريکا د خزانې وزارت ټاکل شويو چارواکو له تېر کال راهيسې څو ځله د پيسو د حکاکۍ او چاپ پر ادارې فشار راوړی څو د ټرمپ د انځور لرونکي ۲۵۰ ډالري نوټ لومړنۍ بېلګه طرحه کړي.
که دا طرحه عملي شي، نو له ۱۵۰ کلونو وروسته به دا لومړی ځل وي چې د يوه ژوندي کس انځور د امريکا پر رسمي پيسو ځای پر ځای کېږي.
د باخبره سرچينو په وينا، د امريکا خزانهدار برېنډن بيچ او د هغه سلاکار مايک براون د اګست او سپټمبر په مياشتو کې څو ازمايښتي طرحې وړاندې کړې دي چې له هغو څخه يوه يې د ۲۵۰ ډالري نوټ په منځ کې د ټرمپ انځور ښيي.
برېټانوی هنرمند اين الکساندر، چې ويل کېږي دغه طرحه يې جوړه کړې، ادعا کړې چې دا ډيزاين د ډونالډ ټرمپ له مستقيمو نظرونو او همغږۍ سره جوړ شوی دی.
د امريکا د خزانې وزارت وياند هم ويلي چې د حکاکۍ او چاپ اداره «د قانوني طرحې په ځواب کې ارزونې او اړين پلانونه ترسره کوي» او که دا وړانديز په قانون بدل شي، د يادګاري بانکنوټ د توليد بهير به پيل شي.
په همدې حال کې، د خزانې وزارت څلورو کارکوونکو ويلي چې د امريکا د چاپ او حکاکۍ ادارې مشرې پاتريشيا پټي سوليمين وروسته له هغه خپله دنده له لاسه ورکړه چې د دې پروژې په اړه يې اندېښنې او مخالفتونه مطرح کړل.
هغې خبرداری ورکړی و چې د دې طرحې پر وړاندې جدي حقوقي او تخنيکي خنډونه موجود دي او د داسې بانکنوټ ډيزاين ښايي کلونه وخت ونيسي.
هممهاله داسې راپورونه هم خپاره شوي چې د ډونالډ ټرمپ په لاسليک د ۱۰۰ ډالري بانکنوټونو چاپ روان دی.
کارپوهان وايي چې د کانګرس له تصويب پرته د ۲۵۰ ډالري بانکنوټ چاپ امکان نه لري او دا طرحه به د حقوقي ننګونو ترڅنګ د مالي او امنيتي ادارو پراخې همغږۍ ته هم اړتيا ولري.
