د امریکا ولسمشر ډونالډ ټرمپ ویلي چې د ایران سره د احتمالي هوکړې په اړه د وروستۍ پرېکړې لپاره له خپلو سلاکارانو سره د سپینې ماڼۍ د بحران مدیریت په خونه کې مشورې کوي.
ټرمپ په ټروت سوشیل ټولنیزه شبکه کې لیکلي چې ایران باید ژمنه وکړي چې هېڅکله به اټومي وسلې یا اټومي بم ته لاسرسی ونه لري او همدارنګه د هرمز تنګی باید سمدستي او له هر ډول محدودیت پرته د بېړیو پر مخ پرانیستل شي.
هغه ادعا کړې چې د بحث لاندې هوکړې یوه برخه د ایران د شاوخوا ۴۰۰ کیلوګرامه غني شویو یورانیمو ایستل او له منځه وړل دي؛ هغه مواد چې د نوموړي په وینا په زیانمنو شویو اټومي تاسیساتو کې تر ځمکې لاندې ساتل کېږي.
د امریکا ولسمشر زیاته کړې چې یوازې امریکا او چین د دغو موادو د انتقال تخنیکي وړتیا لري او دا بهیر به د ایران او د اټومي انرژۍ د نړیوالې ادارې په همغږۍ ترسره شي.
په مقابل کې، محمدباقر قالیباف ویلي چې ایران خپلې امتیازونه د پوځي ځواک له لارې ترلاسه کړي، نه د خبرو اترو له لارې.
هغه ټینګار کړی چې تهران د امریکا پر ژمنو او تضمینونو باور نه لري او یوازې عملي اقدامات د پرېکړې معیار ګڼي.
هممهاله، ایراني دولتي رسنیو د مذاکره کوونکي ټیم ته د نږدې سرچینو له قوله راپور ورکړی چې تر اوسه هېڅ وروستۍ یا تایید شوې د سولې هوکړه نه ده شوې.
د دغو څرګندونو له مخې، سره له دې چې د تهران او واشنګټن ترمنځ د احتمالي توافق په اړه اټکلونه زیات شوي، لا هم د مذاکراتو د جزییاتو او وروستۍ پایلې په اړه مهم اختلافات او ابهامونه موجود دي.
