په کابل کې د طالبانو تر کنټرول لاندې د ښاروالۍ ځینې برکنار شوي کارکوونکي د دغې ډلې چارواکي پر تبعیضي او سلیقهییز چلند تورنوي.
دوی وایي طالبان په بېلابېلو پلمو هغه مسلکي او متخصص کسان له دندو لرې کوي چې د پخواني حکومت له وخته په دې اداره کې کار کاوه او پر ځای یې خپل اړوند کسان ګوماري.
د دغو کارکوونکو په وینا، دوی پرته له کوم موجه دلیل او یوازې د سلیقهییزو پرېکړو له مخې د وظیفوي غفلت او غیرحاضرۍ په تور له دندو منفک شوي، حال دا چې ادعا کوي هېڅ ډول غیرحاضري یې نه ده کړې او د حاضرۍ الکترونیکي سیستم او کاري اسناد دا موضوع ثابتولای شي.
انجنیر رحمتالله، چې یو له برکنار شوو کارکوونکو څخه دی، ویلي چې شاوخوا نهه کاله یې د زیربناوو د ثبت او څارنې په آمریت کې د انجنیر په بست کې کار کړی، خو د غیرحاضرۍ او وظیفوي غفلت په تور له دندې لرې شوی دی.
هغه د طالبانو له ښاروالۍ غوښتي چې د موضوع د ارزونې لپاره د حاضرۍ الکترونیکي سیستم او موجود اسناد وڅېړي.
رحمتالله همدارنګه د طالبانو ښاروال ته په یوه لیک کې د ساختماني پروژو او د ساختماني موادو د اسنادو د تایید په بهیر کې د احتمالي فساد شکایت کړی او ویلي یې دي چې ځینې طالب چارواکي د دغو موضوعاتو د قانوني څېړنې مخه نیسي.
په ورته وخت کې، ځايي سرچینې وایي چې د کابل ښار په بېلابېلو ناحیو کې یو شمېر هزاره انجنیران هم، سره له کاري تجربې، د طالبانو له خوا له دندو لرې شوي دي.
د سرچینو په وینا، دا بهیر د کابل په څلورمې، شپږمې او دیارلسمې ناحیو کې دوام لري او ځینې کارکوونکي په بېلابېلو پلمو له خپلو دندو ګوښه شوي دي.
نورې سرچینې د طالبانو تر ادارې لاندې د کابل ښاروالۍ پر کارګرانو او کارکوونکو د سخت کاري فشار خبره کوي او وایي چې ډېر کسان د پنجشنبې په ورځو کې هم له سهاره تر ماښامه، پرته له مناسبو کاري شرایطو، بوخت ساتل کېږي.
همدارنګه د ښاروالۍ په پروژو کې د اداري فساد د زیاتوالي ادعاوې هم مطرح شوې دي.
سرچینې ادعا کوي چې په ځینو پروژو کې ساختماني مواد پرته له قانوني مراحلو، لابراتواري ازموینو او شفافو قراردادونو کارول کېږي او یو شمېر قراردادونه د طالبانو د چارواکو نږدې شرکتونو ته سپارل شوي دي.
دا په داسې حال کې ده چې تر دې مخکې هم د پخواني حکومت د کارکوونکو د برکنارۍ او د طالبانو د نږدې کسانو د ګومارنې په اړه راپورونه خپاره شوي وو.
منتقدان وایي، د دې بهیر دوام کولای شي د دولتي ادارو تخنیکي او مسلکي ظرفیت کمزوری او د طالبانو تر کنټرول لاندې ادارو کې بېباوري زیاته کړي.
