د اسرائیل لومړي وزیر بنیامین نتانیاهو په یوه پیغام کې چې په عبري ژبه یې د ایکس ټولنیزې شبکې له لارې خپور کړی، ټینګار کړی چې ایران به د هغه د صدارت پر مهال اټومي وسلې ترلاسه نه کړي.
نتانیاهو لیکلي: «تر هغه چې زه د اسرائیل لومړی وزیر یم، ایران به اټومي وسلې ترلاسه نه کړي.»
دغه څرګندونې داسې مهال مطرح کېږي چې د ایران او امریکا ترمنځ د احتمالي نوي توافق په اړه راپورونه زیات شوي او د دواړو هېوادونو چارواکو د مذاکراتو د پام وړ پرمختګ خبر ورکړی دی.
هممهاله، اکسیوس ویبپاڼې د باخبره سرچینو له قوله راپور ورکړی چې نتانیاهو د تهران او واشنګټن د احتمالي توافق د بهیر له چټک پرمختګ څخه حیران شوی دی.
د راپور له مخې، دوو امریکایي سرچینو ویلي چې واشنګټن په وروستیو ورځو کې د مذاکراتو ټول جزئیات له اسرائیلي چارواکو سره نه دي شریک کړي.
همدې موضوع د اسرائیل په سیاسي او امنیتي کړیو کې اندېښنې زیاتې کړې دي.
اکسیوس زیاته کړې چې نتانیاهو هڅه کړې د امریکا له نږدې متحدانو او شریکانو سره د اړیکو له لارې د مذاکراتو او احتمالي توافق په اړه نور معلومات ترلاسه کړي.
د راپور له مخې، د اسرائیل اساسي اندېښنه دا ده چې احتمالي توافق ښايي د ایران اټومي پروګرام په بشپړه توګه محدود نه کړي او یا هم په راتلونکې کې د تهران د احتمالي اټومي وړتیاوو مخه په بشپړ ډول ونه نیسي.
اسرائیل په تېرو کلونو کې څو ځله د ایران او نړیوالو قدرتونو ترمنځ د اټومي توافقونو مخالفت کړی او ټینګار یې کړی چې د ایران د اټومي کېدو مخنیوی د دې هېواد د ملي امنیت له مهمو لومړیتوبونو څخه دی.
سره له دې چې د احتمالي توافق په اړه اټکلونه زیات شوي، تر اوسه د مذاکراتو هېڅ لوري د توافق رسمي جزئیات نه دي خپاره کړي او د وروستۍ موافقې محتوا لا هم روښانه نه ده.
د دې تحول اهمیت په دې کې دی چې د ایران او امریکا هر احتمالي توافق به نه یوازې د دواړو هېوادونو اړیکې اغېزمنې کړي، بلکې د اسرائیل امنیتي محاسبې، د سیمې ځواک توازن او د منځني ختیځ راتلونکی سیاسي وضعیت به هم تر اغېز لاندې راولي.
