د اسرائیل هوافضا صنعت د خپل نوي نسل جګړهییز مدیریت سیستم OPAL-NG معرفي کړی؛ یو داسې پرمختللی سیستم چې د مصنوعي ځیرکتیا پر بنسټ جوړ شوی او موخه یې په جګړهییز ډګر کې د پرېکړو چټکتیا او د ځواکونو ترمنځ همغږي زیاتول دي.
د خپرو شویو معلوماتو له مخې، دغه سیستم د هوايي، ځمکنیو او سمندري ځواکونو ترمنځ یو ګډ عملیاتي انځور رامنځته کوي او قوماندانانو ته دا وړتیا ورکوي چې معلومات په هممهاله ډول ترلاسه، تحلیل او له بېلابېلو واحدونو سره شریک کړي.
د سیستم جوړوونکي وایي OPAL-NG د پخواني OPAL سیستم د عملیاتي تجربو پر بنسټ جوړ شوی دی. پخوانی سیستم تر دې وړاندې په جنګي الوتکو، چورلکو، بېپیلوټه الوتکو، سمندري بېړیو او د قوماندې په مرکزونو کې کارول شوی و.
نوی سیستم د مصنوعي ځیرکتیا پرمختللې ټکنالوژۍ کاروي څو د معلوماتو پروسس، د هدفونو لومړیتوب ټاکل او د عملیاتو اړوند پرېکړې چټکې او اغېزمنې کړي.
د OPAL-NG یوه مهمه ځانګړنه د سرنشین لرونکو او بېسرنشینه وسایطو ترمنځ همغږي ده؛ هغه برخه چې په معاصرو جګړو کې ورځ تر بلې زیات اهمیت پیدا کوي.
د اسرائیل هوافضا صنعت ویلي چې دغه سیستم د استخباراتي معلوماتو راټولولو، برېښنايي جګړې، ګډو عملیاتو د مدیریت او همغږو بریدونو په څېر ماموریتونو کې کارېدلی شي.
همدارنګه سیستم د ناټو له معیارونو سره برابر جوړ شوی او د اسرائیل د هغو هڅو برخه ګڼل کېږي چې غواړي د قوماندې، کنټرول او جګړهییزو ټکنالوژیو نوی نسل رامنځته کړي.
د OPAL-NG معرفي کېدل داسې مهال ترسره کېږي چې په نړۍ کې د مصنوعي ځیرکتیا پوځي کارونې او د پرمختللو قوماندې سیسټمونو سیالي په چټکۍ سره پراخېږي.
د دې پرمختګ مهم اړخ دا دی چې راتلونکې جګړې به تر ډېره د معلوماتو د چټک تحلیل، د مصنوعي ځیرکتیا د وړتیاوو او د بېلابېلو ځواکونو د همغږۍ پر بنسټ ترسره کېږي؛ هغه برخه چې اوس د لویو پوځي قدرتونو د سیالۍ مهم محور ګرځېدلې ده.
