د شمالي کوریا مشر کیم جونګ اون د لس زره ټُنه یوې نوې جنګي بېړۍ د جوړولو او د اوبتل وسلو د نوي نسل د پراختیا امر کړی دی؛ هغه اقدام چې د پیونګ یانګ د پوځي وړتیاوو د پیاوړتیا او ستراتیژیکې بازدارندګۍ د پراخولو د هڅو دوام بلل کېږي.
الجزیرې راپور ورکړی چې کیم جونګ اون د څو پوځي تاسیساتو د لیدنې او د سمندري ازموینو د څارنې پر مهال د دفاعي او بریدیزو وړتیاوو پر لا زیات پرمختګ ټینګار کړی دی.
د شمالي کوریا مشر همدارنګه د اټومي موادو له یوه نوي تولیدي مرکز څخه لیدنه کړې او د هېواد د اټومي وسلو د زېرمې د «چټک او پراخ» زیاتوالي غوښتنه یې کړې ده.
کیم ویلي چې د سیمې امنیتي وضعیت او موجود ګواښونه ایجابوي چې پیونګ یانګ خپل د بازدارندګۍ ځواک په دوامداره توګه پیاوړی کړي.
هغه ټینګار کړی چې د شمالي کوریا سمندري ځواک باید د هر ډول احتمالي اټومي او پوځي ګواښونو د مقابلې وړتیا ولري او له همدې امله د جنګي بېړیو او پرمختللو اوبتل وسلو پراختیا د هېواد له مهمو لومړیتوبونو څخه ده.
د شمالي کوریا مشر د ځمکني، سمندري او هوايي ځواکونو د هممهاله پرمختګ غوښتنه هم کړې او ویلي یې دي چې پوځ باید په ټولو برخو کې له پرمختللو تجهیزاتو او اغېزمنې بازدارندګۍ برخمن شي.
دا اعلان داسې مهال کېږي چې شمالي کوریا په وروستیو کلونو کې خپل د توغندیو ازموینې او اټومي پروګرامونه پراخ کړي دي.
د پیونګ یانګ دغو فعالیتونو د امریکا، سویلي کوریا او د هغوی د متحدانو اندېښنې زیاتې کړې او د ختیځې اسیا د امنیتي وضعیت په اړه یې نړیوال بحثونه راپارولي دي.
پوځي شنونکي باور لري چې د لس زره ټُنه جنګي بېړۍ جوړول ښيي شمالي کوریا غواړي د خپل سمندري ځواک د پراختیا نوي پړاو ته داخل شي.
د دوی په وینا، که دا پروژه بشپړه شي، د شمالي کوریا د سمندري عملیاتو وړتیا به په سیمه ییزو اوبو کې د پام وړ لوړه شي.
د دې پرمختګ اهمیت یوازې د یوې نوې جنګي بېړۍ په جوړولو کې نه دی، بلکې دا د شمالي کوریا د هغې ستراتیژۍ برخه ګڼل کېږي چې غواړي د پوځي فشارونو او نړیوالو بندیزونو تر څنګ خپل اټومي او دفاعي ځواک نور هم پراخ کړي.
شنونکي وایي د اټومي او سمندري پروګرامونو دوامداره پراختیا کولای شي د ختیځې اسیا پر امنیتي توازن، سیمه ییزو اړیکو او د نړۍ د سترو قدرتونو پر ستراتیژیکو محاسبو ژور اغېز وکړي.
