د پاکستان د کورنیو چارو وزیر محسن نقوي د تاجیکستان د کورنیو چارو له وزیر رمضان رحیمزاده سره په لیدنه کې ادعا کړې چې په افغانستان کې د هغو مرکزونو شتون چې نوموړي یې «ترهګریز کمپونه» بللي، د سیمې د هېوادونو لپاره جدي امنیتي اندېښنې رامنځته کړې دي.
دغه لیدنه د قرغزستان په پلازمېنه بیشکک کې د شانګهای همکاریو سازمان د غړو هېوادونو د کورنیو چارو او امنیتي چارواکو د غونډې په څنډه کې ترسره شوې ده.
د پاکستاني رسنیو د راپورونو له مخې، دواړو لورو د افغانستان امنیتي وضعیت، د وسلهوالو ډلو فعالیتونه او د نشهیي توکو د قاچاق په اړه خبرې کړې دي.
راپورونه دا ادعا هم کوي چې شاوخوا ۲۵ وسلهوالې ډلې دا مهال په افغانستان کې فعالیت لري، خو دغه ادعا تر اوسه د خپلواکو سرچینو له خوا نه ده تایید شوې.
محسن نقوي ویلي چې له افغانستانه سرچینه اخیستونکي امنیتي ګواښونه یوازې د یوه هېواد ستونزه نه ده، بلکې د ټولې سیمې پر امنیت او ثبات اغېز کولای شي.
هغه د سیمې له هېوادونو غوښتي چې د ترهګرۍ او نورو امنیتي ګواښونو پر وړاندې خپلې ګډې همکارۍ لا پیاوړې کړي.
تر اوسه د تاجیکستان کورنیو چارو وزارت د دې لیدنې او مطرح شویو موضوعاتو په اړه کوم تفصیلي رسمي دریځ نه دی خپور کړی.
دا څرګندونې داسې مهال مطرح کېږي چې طالبان په افغانستان کې د ترهګرو ډلو شتون او فعالیتونه په دوامداره توګه ردوي.
طالب چارواکو څو ځله ویلي چې هېڅ فرد یا ډلې ته اجازه نه ورکوي چې د افغانستان له خاورې د نورو هېوادونو پر ضد استفاده وکړي.
د طالبانو او پاکستان اړیکې په وروستیو کلونو کې، په ځانګړي ډول د امنیتي موضوعاتو پر سر، له جدي اختلافاتو سره مخ شوې دي.
اسلاماباد پر طالبانو تور لګوي چې د پاکستاني طالبانو تحریک او د بلوڅ بېلتونپالو ځینې غړي په افغانستان کې حضور لري او له هغه ځایه خپلې حملې تنظیموي.
طالبانو دغه تورونه رد کړي او ټینګار یې کړی چې د پاکستاني طالبانو موضوع د پاکستان داخلي مسئله ده.
د طالبانو ویاند ذبیحالله مجاهد مخکې ویلي وو: «پاکستان باید خپلې امنیتي ستونزې د خپلو پولو دننه حل کړي او پړه یې پر افغانستان وانه چوي.»
سره له دې، د پاکستان امنیتي اندېښنې په وروستیو میاشتو کې لا زیاتې شوې دي او د دواړو لورو په اړیکو کې په یوه مهم بحث بدلې شوې دي.
سرحدي نښتې، متقابل تورونه او امنیتي پېښې د کابل او اسلاماباد اړیکې د وروستیو کلونو له تر ټولو حساسو پړاوونو سره مخ کړې دي.
د دې موضوع اهمیت په دې کې دی چې افغانستان لا هم د سیمهییزو امنیتي بحثونو په مرکز کې قرار لري.
د منځنۍ اسیا هېوادونو، پاکستان، روسیې او چین په بېلابېلو غونډو کې د افراطیت، ترهګرۍ او د نشهیي توکو د قاچاق په اړه اندېښنې څرګندې کړې او له طالبانو یې د لا ډېرو تضمینونو غوښتنه کړې ده.
په داسې حال کې چې طالبان د افغانستان د بشپړ امنیت او د خاورې د کنټرول ادعا کوي، د سیمې هېوادونو دوامداره اندېښنې ښيي چې د افغانستان امنیتي وضعیت لا هم د سیمې د مهمو بحثونو له جملې څخه دی.
شنونکي باور لري چې د افغانستان امنیتي مسئله به د سیمهییزو سازمانونو او راتلونکو ډیپلوماتیکو غونډو په اجنډا کې مهم ځای ولري او د سیمې د هېوادونو ترمنځ د همغږۍ یو اساسي محور به پاتې شي.
