د ایټالیا لومړۍ وزیرې جورجیا میلوني د هغو درې افغان کډوالو او یوه پاکستاني وګړي د ژوندي سوځولو پېښه «وحشتناک جنایت» بللې او ژمنه یې کړې چې عاملان به یې د عدالت منګولو ته وسپارل شي.
میلوني ویلي چې د قضیې شکمن کسان نیول شوي او دا چاره د حقیقت د روښانېدو او د مجرمینو د سزا کولو په لور یو مهم ګام ګڼل کېږي.
هغې په یوه بیان کې ویلي: «په کالابریا کې د څلورو کرنیزو کارګرانو وحشتناکې وژنې موږ ټول سخت خواشیني کړي یو. ایټالیا به د تاوتریخوالي او وحشت پر وړاندې شاتګ ونه کړي.»
د ایټالیا لومړۍ وزیرې ټینګار کړی چې د دې جنایت د ټولو اړخونو روښانول او د عاملانو محاکمه کول د حکومت له مهمو لومړیتوبونو څخه دي.
د راپورونو له مخې، تورن کسان د امنیتي کمرېو د انځورونو او نورو شواهدو پر بنسټ پېژندل شوي دي.
د دې دوسیې څارنوال الیساندرو دالسیو ویلي: «په دېرش کلن کاري ژوند کې مې هېڅکله د دومره بې رحمۍ او قساوت پېښه نه وه لیدلې.»
ایټالوي رسنیو راپور ورکړی چې پېښه د ایټالیا د کوزنزا ولایت اړوند د آمندولارا په ښارګوټي کې رامنځته شوې ده.
د قربانیانو په ډله کې ۲۸ کلن امین افضل خوګیاڼی، ۲۷ کلن صفي ایجاد، ۱۹ کلن عصمت الله قائمي او ۲۹ کلن پاکستانی وسیم خان شامل دي.
لومړنۍ څېړنې ښيي چې دوه ۳۲ کلن پاکستانیان، چې د کډوالو د کارګرانو د استثمار په تور تورن دي، د کارګرانو د موټر دروازې تړلې او وروسته یې پرې تېل شیندلي او موټر ته یې اور اچولی دی.
د قربانیانو سوځېدلي جسدونه وروسته د یوه د تېلو پمپ ترڅنګ د موټر دننه موندل شوي دي.
د پېښې یوازینی ژوندي پاتې شوی افغان تاج محمد نومېږي. هغه توانېدلی چې د موټر ښیښه ماته کړي او د اور له لمبو ځان وژغوري.
تاج محمد رسنیو ته ویلي چې دوی له یوې میاشتې ډېر وخت معاش نه و ترلاسه کړی او تورنو کسانو به د وسلې او چړې په زور کار ته اړ ایستل.
د هغه په وینا، قربانیان هغه مهال هدف وګرځېدل چې د قرارداد پرته او استثماري شرایطو کې د کار دوام ته حاضر نه شول.
دې پېښې یو ځل بیا په ایټالیا کې د «کاپورالاتو» په نوم د هغه غیرقانوني سیستم پر لور پام اړولی چې له مخې یې د کډوالو کارګران د غیرقانوني شبکو له خوا استثمارېږي.
د یوې څېړنیزې ادارې د معلوماتو له مخې، په ۲۰۲۳ کال کې نږدې دېرش سلنه کرنیز کارګران په ایټالیا کې له رسمي قرارداد پرته کار کاوه.
د کارګرانو اتحادیې وایي چې له دوو لکو زیات بې اسناده کډوال په ایټالیا کې کار کوي او د قانوني ملاتړ د نشتوالي له امله د استثمار، تاوتریخوالي او جبري کار له خطر سره مخ دي.
د بشري حقونو فعالان وایي دا پېښه یوازې یوه جنایي دوسیه نه ده، بلکې د هغو زرګونو کډوالو د ستونزمن ژوند انځور هم وړاندې کوي چې په اروپا کې له سختو شرایطو، ټیټو معاشونو او محدودو حقونو سره کار کوي.
دوی له ایټالیا غواړي چې د عاملانو تر مجازاتولو سربېره، د کډوالو د استثمار شبکې له منځه یوسي او د کارګرو د خوندیتوب لپاره بنسټیز اصلاحات ترسره کړي.
