د ایټالیا پولیسو اعلان کړی چې د دغه هېواد په جنوب کې د یو موټر د قصدي سوځولو له امله د درې افغانانو او یوه پاکستاني وګړي د وژل کېدو په تړاو یې دوه شکمن کسان نیولي دي.
د پولیسو په وینا، پېښه د ایټالیا د کالابریا سیمې په آمندولارا ښارګوټي کې رامنځته شوې او قربانیان د کرنې په برخه کې کارکوونکي مهاجر کارګران وو.
د ایټالیا دولتي ټلوېزیون راپور ورکړی چې وژل شوي کسان درې افغانان او یو پاکستانی وو. د راپور له مخې، نیول شوي دوه شکمن کسان هم د پاکستان تابعیت لري.
د ایټالوي رسنیو له خوا خپاره شوي امنیتي انځورونه ښيي چې شکمنو کسانو پر موټر د سوځېدونکي مایع له شیندلو وروسته هغه ته اور اچولی دی.
د راپورونو له مخې، اور په چټکۍ سره خپور شوی او قربانیان د موټر دننه بند پاتې شوي دي. عدلي چارواکي دغه قضیه د قصدي وژنې په توګه څېړي.
په همدې پېښه کې یو افغان وګړی چې په موټر کې موجود و، توانېدلی چې د اور له لمبو ځان وباسي. نوموړی د سوځېدو له ټپونو سره روغتون ته لېږدول شوی او تر درملنې لاندې دی.
د کاستروویلیاري ښار څارنوال الیساندرو دالسیو ویلي چې د قربانیانو جسدونه د دوشنبې په ورځ د سوځېدلي موټر دننه موندل شوي او د پېښې د انګېزو د معلومولو لپاره پراخې څېړنې روانې دي.
کالابریا د ایټالیا له هغو سیمو څخه ده چې زرګونه بهرني کارګران پکې د کرنې په سکتور کې کار کوي. د کډوالو د حقونو مدافع بنسټونو تر دې وړاندې هم د دغو کارګرانو د کاري شرایطو، تبعیض او امنیتي ستونزو په اړه اندېښنې څرګندې کړې دي.
دا پېښه په وروستیو کلونو کې په اروپا کې د افغان کډوالو پر وړاندې له مرګونو او دردناکو پېښو څخه یوه بلل کېږي. څېړونکي باور لري چې د پولیسو او عدلي ادارو موندنې به د دې جرم د اصلي انګېزو او شالید په اړه نور معلومات هم روښانه کړي.
د درې افغانانو وژل کېدل یو ځل بیا د کډوالو د امنیت او په اروپایي هېوادونو کې د هغوی د خوندیتوب په اړه اندېښنې راپارولي دي.
