د امریکا ولسمشر ډونالډ ټرمپ د هغو هنرمندانو او موسیقارانو په غبرګون کې چې د امریکا د خپلواکۍ د ۲۵۰ کلنۍ د لمانځنې په مراسمو کې له ګډون او اجرا کولو تېر شوي، هغوی «درېیمه درجه هنرمندان» بللي دي.
یو شمېر امریکایي رسنیو راپور ورکړی چې ځینو هنرمندانو د دې اندېښنې له امله له ګډون څخه ډډه کړې چې ښایي دغه مراسم د ټرمپ له ادارې سره سیاسي تړاو پیدا کړي.
ټرمپ د شنبې په ورځ په خپلو څرګندونو کې وویل چې دغه هنرمندان لوړ شهرت او ځانګړی هنري ځای نه لري او ادعا یې وکړه چې خپله د امریکا د موسیقۍ د تاریخ له مشهورو ستورو هم ډېر مخاطبین راجلبولی شي.
هغه وویل: «زه د الویس پریسلي د شهرت له اوج دورې هم زیات خلک راجذبوم.»
د امریکا ولسمشر همدارنګه ویلي چې ښایي په شخصي توګه د خپلواکۍ د ۲۵۰ کلنۍ په مراسمو کې ګډون وکړي او وینا هم وکړي.
ټاکل شوې ده چې د امریکا د خپلواکۍ ۲۵۰ کلن جشن د هېواد په بېلابېلو سیمو کې د کلتوري، هنري او ملي پروګرامونو په ترڅ کې ترسره شي، خو له اوسه یې شاوخوا سیاسي او کلتوري بحثونه راپورته شوي دي.
منتقدان وایي چې دغه مراسم ښایي د سیاسي موخو لپاره وکارول شي، په داسې حال کې چې د ټرمپ ملاتړي دا جشن د امریکا د تاریخ، هویت او ملي ارزښتونو د درناوي یوه مهمه برخه بولي.
د امریکا د خپلواکۍ د ۲۵۰ کلنۍ لمانځنه د راتلونکو ملي مراسمو له مهمو پروګرامونو څخه ګڼل کېږي او تمه ده چې په اړه یې بحثونه او غبرګونونه دوام ومومي.
