ډېلي مېل ورځپاڼې په یوه څېړنیز راپور کې ویلي چې سره له دې چې طالبانو د «بچهبازۍ» د منع کولو اعلان کړی، په افغانستان کې د هلک ماشومانو جنسي ځورونه لا هم دوام لري او قربانیان یې له سختو جسمي او رواني ستونزو سره مخ دي.
راپور د قربانیانو د روایتونو، د بشري حقونو د اسنادو او نړیوالو راپورونو پر بنسټ څرګندوي چې ځینې بانفوذه کسان، سیمهییز قوماندانان او د نفوذ خاوندان په دې پدیده کې ښکېل بلل شوي دي.
د راپور له مخې، په ځینو مواردو کې بېوزله او زیانمن ماشومان په شخصي محفلونو کې د نڅا لپاره کارول شوي او وروسته د جنسي ناوړه استفادې هدف ګرځېدلي دي.
یو شمېر قربانیانو ویلي چې له کلونو ځورونې وروسته پرته له رواني، ټولنیز او طبي ملاتړ څخه یوازې پرېښودل شوي دي.
ډېلي مېل د امریکا د بهرنیو چارو وزارت د بشري قاچاق راپور ته هم اشاره کړې چې پکې د بچهبازۍ، د ماشومانو د جذب او د کمعمره کسانو د ناوړه استفادې د دوام په اړه اندېښنه څرګنده شوې ده.
په راپور کې راغلي چې له ۲۰۲۱ کال وروسته د نړیوالو مرستو کمېدو د قربانیانو لپاره د درملنې، ملاتړ او بیا رغونې خدماتو ته لاسرسی خورا محدود کړی دی.
راپور د دې پدیدې تاریخي مخینې ته په اشارې سره لیکي چې بچهبازي له لسیزو راهیسې په افغانستان کې شتون لري او په بېلابېلو دورو کې د مختلفو ډلو او اشخاصو له خوا کارول شوې ده.
د راپور په وینا، قربانیان د لویوالي پر مهال له ژور خپګان، روږدتیا، بېکوره کېدو او جدي رواني ستونزو سره مخ کېږي.
طالبانو تر اوسه د راپور د جزئیاتو په اړه رسمي غبرګون نه دی ښودلی، خو مخکې یې ویلي وو چې د بچهبازۍ له پدیدې سره مخالف دي او دا عمل یې منع کړی دی.
راپور په پای کې خبرداری ورکوي چې ماشومان او ښځې په افغانستان کې لا هم د ناوړه استفادې، تاوتریخوالي او د کافي ملاتړ د نشتوالي له خطر سره مخ دي او ډېری قربانیان عدالت او د بیا رغونې خدمتونو ته لاسرسی نه لري.
