د افغانستان د پخواني حکومت د عدلیې وزیر فضل احمد معنوي د طالبانو د مشر ملا هبتالله اخندزاده د اختر پیغام ته په غبرګون کې د هغه صلاحیت د عمومي عفوې لپاره تر پوښتنې لاندې راوستی او ویلي یې دي چې د افغانستان روان بحران د «عفوې» په نوم له یوه تعارفي اعلان سره نه حل کېږي.
د طالبانو مشر د لوی اختر په پیغام کې یو ځل بیا له خپلو مخالفانو غوښتي وو چې د عمومي عفوې له فرصت څخه په استفادې افغانستان ته بېرته ستانه شي.
خو معنوي په ځواب کې ویلي چې تر هر څه مخکې باید دا روښانه شي چې څوک د چا د عفوې صلاحیت لري.
هغه د افغانستان د څو لسیزو جګړو او اوسني وضعیت ته په اشارې ویلي چې هغه کسان چې هېواد یې د ورانۍ، فقر، بحران او پراخو محدودیتونو لور ته بیولی، باید د خپلو کړنو په اړه ځواب ووايي.
پخواني وزیر همدارنګه ټینګار کړی چې د افغانانو پراخه کډوالي د ظلم، تنګسیا او بېعدالتۍ پایله ده، نه هغه عوامل چې طالبان یې یادونه کوي.
د هغه په وینا، زرګونه افغانان اړ شوي چې هېواد پرېږدي او که شرایط برابر شي، لا ډېر کسان به هم له افغانستانه ووځي.
معنوي د طالبانو له مشر څخه غوښتي چې له ځانه وپوښتي ولې ډېر افغانان، سره له دې چې په ګاونډیو هېوادونو کې له سختو ستونزو سره مخ دي، بیا هم د طالبانو تر واک لاندې افغانستان ته د بېرته ستنېدو پر ځای بهر ژوند غوره ګڼي.
هغه همدارنګه وړاندیز کړی چې یوه خپلواکه او بېطرفه اداره دې د خلکو د رضایت او نارضایتۍ په اړه شفافه سروې ترسره کړي څو د افغانانو حقیقي نظر روښانه شي.
د پخواني حکومت د عدلیې وزیر ویلي چې د افغانستان بحران د عفوې په اعلان، اجباري بیعت او د مخالفانو د تسلیمېدو په غوښتنو نه حل کېږي، بلکې ملت داسې غوښتنې او اړتیاوې لري چې سیاسي او ملي حللارو ته اړتیا لري.
دا څرګندونې په داسې حال کې مطرح کېږي چې طالبانو په تېرو نږدې پنځو کلونو کې څو ځله له سیاسي مخالفانو او د پخواني حکومت له چارواکو غوښتي چې افغانستان ته بېرته راستانه شي، خو تر اوسه هېڅ مخکښې سیاسي څېرې دغه بلنه نه ده منلې.
