د طالبانو د کډوالو چارو عالي کمېسیون اعلان کړی چې پاکستان د شنبې په ورځ، د ثور په ۲۶مه، ۵ زره او ۱۲۶ افغان کډوال ایستلي دي.
د کمېسیون په وینا، دغه کډوال د تورخم او سپین بولدک له لارو افغانستان ته داخل شوي دي.
د طالبانو د کډوالو چارو عالي کمېسیون زیاته کړې چې په همدې ورځ ۱۷۵ نور افغان کډوال هم د ایران له لوري د اسلامقلعه او ورېښمو لارې له لارې افغانستان ته بېرته ستانه کړل شول.
په وروستیو میاشتو کې، له پاکستان سره د طالبانو د اړیکو د ترینګلتیا له زیاتېدو سره هممهاله، اسلامآباد د افغان کډوالو د ایستلو بهیر چټک کړی دی.
راپورونه ښيي چې هره ورځ د پام وړ شمېر افغان کډوال له پاکستانه ایستل کېږي.
نړیوالو سازمانونو څو ځله خبرداری ورکړی چې افغانستان له سخت اقتصادي او بشري بحران سره مخ دی او د دغو بېرته ستنېدونکو د منلو او ادغام لپاره کافي ظرفیت نه لري.
دغه بنسټونه همدارنګه ټینګار کوي چې د کډوالو بېرته ستنول، په ځانګړي ډول ښځې، خبریالان، پخواني نظامیان او د مخکیني حکومت کارکوونکي، له جدي امنیتي ګواښونو سره مخ کولای شي.
په پاکستان کې یو شمېر افغان پناه غوښتونکي وایي چې د ایستلو د بهیر له سختېدو سره یې ژوند له وېرې، اندېښنې او بېسرنوشتی سره مل شوی دی.
ځینو کډوالو خبرداری ورکړی چې که افغانستان ته بېرته واستول شي، ژوند به یې له خطر سره مخ شي.
