د افغانستان لپاره د امریکا پخواني ځانګړي استازي زلمي خلیلزاد په اکس ټولنیزه شبکه کې ادعا کړې چې د پاکستان پوځ ایراني پوځي الوتکو ته اجازه ورکړې څو د دغه هېواد په خاوره کې پټې شي.
هغه ویلي، دا اقدام په داسې حال کې ترسره کېږي چې پاکستان هممهاله د واشنګټن او تهران ترمنځ د مذاکراتو د اسانتیا رول هم لوبوي.
خلیلزاد دغه موضوع د اسلامآباد د «دوهګوني سیاست» نښه بللې ده.
هغه زیاته کړې چې پاکستان په تېرو څلورو لسیزو کې له امریکا سره همکاري کړې، خو په ځینو مواردو کې یې د واشنګټن د ګټو پر ضد هم عمل کړی دی.
دغه پخواني امریکایي چارواکي د خپلې ادعا په اړه نور جزییات یا اسناد نه دي وړاندې کړي.
خو د هغه څرګندونو د سیمې د ترینګلتیاوو او د ایران، پاکستان او امریکا د اړیکو په اړه حساس وضعیت کې پراخ غبرګونونه راپارولي دي.
سیاسي شنونکي وایي، پاکستان تل هڅه کړې چې د سیمې او نړۍ د سیالو قدرتونو ترمنځ توازن وساتي او له متضادو لوبغاړو سره له هممهاله اړیکو د خپلو ستراتیژیکو ګټو لپاره کار واخلي.
د کارپوهانو په باور، که دغه ادعاوې رښتیا وي، نو دا ښيي چې اسلامآباد په اوسني بحران کې هم په څو جبهو کې هممهاله لوبه کوي؛ له یوې خوا له امریکا سره اړیکې ساتي او دیپلوماتیک رول لوبوي، او له بلې خوا له ایران سره د مستقیمې ترینګلتیا د مخنیوي هڅه کوي.
شنونکي خبرداری ورکوي چې د دغسې ابهامونو دوام ښایي د امریکا او پاکستان ترمنځ د باور پر کچه اغېز وکړي او د سیمې جیوپولیټیکي پیچلتیاوې لا زیاتې کړي.
