رابعه نسیمي، افغان الاصله بریتانیا مېشتې سیاستوالې او د لندن د کارګر ګوند اړوند یوې شورا غړې، په افغانستان کې د ښځو د زدهکړو او کار بندیز «دردناک» او «ژور خواشینوونکی» بللی او له افغان کورنیو یې غوښتي چې د ښځو او نجونو د زدهکړو او کار ملاتړ ته دوام ورکړي.
هغې په یوه ځانګړې مرکه کې ټینګار کړی چې افغان نارینه باید اجازه ور نه کړي چې ښځې او نجونې په اوسني محدودوونکي وضعیت کې له ناهیلۍ سره مخ شي.
نسیمي همداراز ویلي چې افغانې ښځې باید خپله هیله له لاسه ور نه کړي، ځکه د هغې په باور د طالبانو واکمني دایمي نه ده او یوه ورځ به ښځې او نجونې بیا د زدهکړو او کار حق ته لاسرسی ومومي.
دغه څرګندونې داسې مهال مطرح کېږي چې د طالبانو محدودیتونه پر ښځو او نجونو لا هم دوام لري او پراخ نړیوال غبرګونونه یې راپارولي دي.
ملګرو ملتونو په خپل وروستي راپور کې خبرداری ورکړی چې که د ښځو پر زدهکړو بندیز تر ۲۰۳۰ کال پورې دوام وکړي، افغانستان به شاوخوا ۲۰ زره ښځینه ښوونکې او له پنځو زرو ډېرې ښځینه روغتیايي کارکوونکې له لاسه ورکړي.
دغه نړیوال بنسټ ټینګار کړی چې د دغو محدودیتونو اغېزې یوازې د ښځو پر فردي حقونو نه محدودېږي، بلکې د افغانستان د ښوونې او روغتیا پر راتلونکي هم مستقیم اغېز کوي.
شنونکي وایي، د رابعه نسیمي څرګندونې د هغې لیدلوري استازیتوب کوي چې هڅه کوي د ناهیلۍ پر وړاندې د امید، ټولنیز مقاومت او د ښځو د حقونو د دوامدار ملاتړ پیغام پیاوړی کړي؛ په ځانګړي ډول په داسې شرایطو کې چې ګڼې افغانې ښځې له عامه ژوند څخه د تدریجي حذف له خطر سره مخ دي.
