د بدخشان ولایت د طالبانو ځايي چارواکي وایي، د دې ولایت په یوه سیمه کې د ځمکې ښویېدنې له امله څلور ماشومان مړه شوي دي.
عبدالمتعال راسخ، د بدخشان د ۲۱۹ عمر ثالث تعلیمي فرقې د تعلیم او تربیې مدیر، ویلي چې دا پېښه د جمعې ورځې شاوخوا ۱۱:۱۵ بجې د وجن اوشنګان علیا کلي د «ایلاق کرهها دره» په سیمه کې رامنځته شوې ده.
د هغه په وینا، ۱۵ کلن عبدالرحمن، ۱۳ کلن عبدالغني، ۱۳ کلن سلیمان او ۱۰ کلن عبدالعزیز د تنور خټو د راټولولو پر مهال د ځمکې د ناڅاپي ښویېدنې له امله تر خاورو لاندې شوي او خپل ژوند یې له لاسه ورکړی دی.
سرچینې زیاته کړې چې قربانیان له یو بل سره خپلوي لرله.
دا پېښه یو ځل بیا د افغانستان په کلیوالو سیمو کې د ځمکې ښویېدنې او د خوندیتوب د امکاناتو د نشتوالي خطرونه برجسته کوي.
په ډېرو لرې پرتو سیمو کې ماشومان او کورنۍ د سختو اقتصادي شرایطو له امله اړ کېږي چې د خپلو ورځنیو اړتیاوو د برابرولو لپاره په ناامنو چاپېریالونو کې کار وکړي؛ هغه وضعیت چې کله ناکله په مرګونو پېښو بدلېږي.
شنونکي وایي، د طبیعي پېښو تر څنګ، بېوزلي او د خوندیتوب د اسانتیاوو نشتوالی هم د دې ډول انساني فاجعو مهم عوامل دي.
