د طالبانو د زندانونو د تنظیم ادارې ویلي چې د ۱۴۰۰ کال له اسد راهیسې تر اوسه پورې شاوخوا دوه زره افغان بندیان له ایران څخه افغانستان ته لېږدول شوي دي.
د طالبانو تر کنټرول لاندې ملي راډیو-تلویزیون د راپور له مخې، د دې ادارې ویاند محمد نسیم لالههاند ویلي چې د دغو بندیانو یوه برخه د سزا تر بشپړېدو وروسته خوشې شوې، خو یو شمېر نور لا هم په بند کې دي.
د هغه په وینا، ایران افغان بندیان په رسمي ډول د طالبانو د زندانونو ادارې ته سپاري، او یوازې په تېر کال کې هم شاوخوا ۴۰۸ تنه په دوو پړاوونو کې افغانستان ته انتقال شوي دي.
همداراز، د طالبانو او د ایران د عدلیې وزارت ترمنځ وروستۍ لیدنې ښيي چې دواړه لوري غواړي دا بهیر پراخ کړي او په عدلي او قضایي برخو کې خپلې همکارۍ پیاوړې کړي.
که څه هم دا بهیر په ظاهره د حقوقي همکاریو په چوکاټ کې وړاندې کېږي، خو شنونکي وایي چې دا د ایران او طالبانو ترمنځ د عملي تعامل یوه بله نښه ده؛ هغه تعامل چې له رسمي پېژندنې پرته هم په تدریجي ډول پراخېږي.
په همدې حال کې، د بندیانو دا لېږد د هغوی د حقوقي وضعیت، د ساتنې شرایطو، او د عادلانه محاکمې د تضمین په اړه نوې پوښتنې راپورته کوي، په ځانګړي ډول هغه مهال چې د افغانستان قضایي نظام له ژورو بدلونونو او جدي ننګونو سره مخ دی.
