د فرانسې د بهرنیو چارو وزیر ژان نوئل بارو ویلي چې فرانسه به د هرمز تنګي په اړه د امریکا په طرحه کې ګډون ونه کړي، او پاریس له لندن سره یوځای خپل جلا وړاندیز وروستی کړی دی.
بارو، چې منځني ختیځ ته په سفر بوخت دی، د جمعې په ورځ په ابوظبۍ کې وویل چې د خلیج هېوادونه یې د بریتانیا او فرانسې له نوښت څخه خبر کړي دي.
د هغه په وینا، پاریس او لندن هڅه کوي د هرمز تنګي د امنیت او ثبات لپاره خپل دیپلوماتیک او ستراتیژیک مسیر تعقیب کړي.
دا څرګندونې داسې مهال مطرح کېږي چې هرمز تنګی د نړیوالې انرژۍ او سمندري امنیت له تر ټولو حساسو سیمو څخه ګڼل کېږي، او د امریکا هره نوې طرحه پکې پراخ نړیوال حساسیتونه راپاروي.
د فرانسې دا دریځ ښيي چې د هرمز په څېر مهمو جیوپولیټیکي موضوعاتو کې اروپایي قدرتونه تل د واشنګټن له تګلارې سره بشپړ همغږي نه لري، او کله ناکله د خپلو امنیتي او سیاسي محاسبو پر بنسټ جلا لارې غوره کوي.
