طالبانو په کابل کې د «اصلاح غږ» راډیو فعالیت درولی او د دې رسنۍ دفتر یې مهر او لاک کړی دی. دغه راډیو وايي، د طالبانو د عدلیې وزارت د جواز او د رسنۍ د نوم په اړه د مطرح شویو ملاحظاتو له امله یې فعالیت درول شوی دی.
«اصلاح غږ» راډیو نن، یکشنبه د وږي ۱۵مه، په یوه خبرپاڼه کې د خپلو فعالیتونو درول تایید کړي او ویلي یې دي چې د طالبانو د عدلیې وزارت یو پلاوی د دې رسنۍ دفتر ته له ورتګ وروسته د راډیو فعالیت درولی دی.
د راډیو په وینا، اوس مهال یې دفتر مهر او لاک دی او خپرنیز فعالیتونه یې په بشپړه توګه درېدلي دي.
«اصلاح غږ» وايي، موضوع له طالبانو سره د اطلاعاتو او کلتور وزارت او عدلیې وزارت له لارې تعقیبوي، څو مطرح شوې ملاحظې حل شي او دغه رسنۍ وکولای شي بېرته خپل فعالیت پیل کړي.
د دې راډیو اداره ټینګار کوي چې په تېرو اوو کلونو کې دغه رسنۍ د یوه حقیقي شخص په ملکیت کې وه او له هېڅ ډول تشکیلاتي، سازماني، ګوندي یا سیاسي جوړښت سره تړاو نه لري.
«اصلاح غږ» راډیو تر دې وړاندې د «جمعیت اصلاح» په نوم فعالیت کاوه؛ خو وروسته له هغې چې د طالبانو استخباراتو د جمعیت اصلاح فعالیت منع کړ، د رسنۍ نوم هم بدل شو.
د طالبانو استخباراتو د ۱۴۰۱ کال په لیندۍ کې د حزبالتحریر، جمعیت اصلاح او نجم په ګډون د یو شمېر سیاسي ډلو او بنسټونو فعالیتونه منع اعلان کړي وو.
د «اصلاح غږ» راډیو د فعالیت درول په داسې مهال دي چې په افغانستان کې رسنۍ په وروستیو کلونو کې د فعالیت، خپرنیزو مطالبو، نوماېښودنې او له طالب ادارو سره د تعامل په برخو کې له پراخو محدودیتونو سره مخ دي.
په دې قضیه کې خپله راډیو د فعالیت د درولو دلیل د جواز او نوم اړوند ملاحظات بللي او هڅه کوي چې د طالبانو له اړوندو ادارو سره د خبرو له لارې د بیا فعالیت اجازه ترلاسه کړي.
د نیمروز په ارزونه، د دې پېښې اهمیت یوازې د یوې راډیو په درول کې نه دی؛ بلکې دا موضوع ښيي چې د طالبانو د رسنیزو محدودیتونو ساحه ښايي یوازې تر خپرېدونکي محتوا محدوده نه وي او د یوې رسنۍ نوم، مخکینی هویت او پخوانۍ اړیکې هم د فعالیت پر دوام اغېز ولري. که «اصلاح غږ» له مطرح شویو ملاحظاتو وروسته بېرته فعالیت پیل کړي، دا به د هغو رسنیو په وړاندې د طالبانو د چلند د انعطاف یوه بېلګه وي چې حساسه مخکینه لري؛ خو که د دې راډیو درول دوام وکړي، په افغانستان کې د خپلواکو رسنیو د فعالیت د فضا په اړه به لا زیاتې اندېښنې رامنځته کړي.
