د مالیې وزارت اعلان کړی چې د اتو دولتي ادارو د تثبیت شویو متقاعدینو د معاشونو د ورکړې بهیر به د ۱۴۰۵ لمریز کال د سنبلې له ۱۰مې نېټې څخه پیل شي.
دغه وزارت د شنبې په ورځ، د سنبلې په ۷مه، د متقاعدینو د معاشونو د ورکړې دیارلسم مهالوېش خپور کړی او ویلي یې دي چې ورکړې به د ټاکل شوي پلان له مخې او په نوبتي ډول ترسره کېږي.
د دې مهالوېش له مخې، د تخنیکي او مسلکي زدهکړو ادارې، د لوړو زدهکړو وزارت او ولایتي پوهنتونونو، د کابل پولیتخنیک پوهنتون، د کابل د ښوونې او روزنې پوهنتون، د کابل پوهنتون ریاست، د کابل طبي پوهنتون عمومي ریاست، همدارنګه د عامه ګټو وزارت او د مخابراتو او معلوماتي ټکنالوژۍ وزارت نظامي متقاعدین د معاشونو د ورکړې په دې پړاو کې شامل دي.
د مالیې وزارت ویلي چې د متقاعدینو د معاشونو ورکړه به د خپاره شوي مهالوېش له مخې تنظیم او عملي کېږي.
