ځايي سرچینې د نیمروز تلویزیون ته وایي چې د دایکنډي ولایت د میرامور ولسوالۍ کې یوه ځوانه ښځه د خپل پخواني مېړه له لوري وژل شوې ده.
د سرچینو په وینا، دا پېښه د دوشنبې په سهار، د وږي په ۲مه، د میرامور ولسوالۍ د «اسکان» په سیمه کې شوې ده.
د وژل شوې ښځې نوم شکیلا ښودل شوی چې شاوخوا ۲۵ کلنه وه، او د پېښې شکمن کس رحمت، شاوخوا ۳۵ کلن، معرفي شوی دی.
یوه سرچینه وایي، شکیلا له خپلې مور او ورور سره پر موټرسایکل د میرامور ولسوالۍ مرکز ته روانه وه چې په لاره کې یې پخواني مېړه ودروله.
د سرچینې په وینا، شکیلا د اسکان-کوپاج پر سرکوتل کې د چرهيي ټوپک په ډزو وویشتل شوه او د ټپونو له امله یې ژوند له لاسه ورکړ.
شکمن کس له پېښې وروسته د میرامور ولسوالۍ د مرکز تګاب پر لور تللی، خو لا معلومه نه ده چې طالبانو ته یې ځان سپارلی که نه.
سرچینې وایي، ټاکل شوې وه چې شکیلا او کورنۍ یې هماغه ورځ د هغې د مهریې د دعوې د تعقیب لپاره د ولسوالۍ مرکز ته لاړ شي. شکیلا له رحمت څخه له بېلتون وروسته د خپلې ۱۲ زره امریکايي ډالرو مهریې د ترلاسه کولو غوښتنه کړې وه.
د سرچینو په وینا، شکیلا او رحمت څو کاله په کابل کې اوسېدل او دوه زامن لري چې شاوخوا اووه او پنځه کلن دي.
سرچینې وایي، دغه جوړه څو میاشتې مخکې د یوې کورنۍ شخړې او پر شکیلا د بل سړي سره د اړیکې د تور له مطرح کېدو وروسته له یو بل څخه جلا شوې وه. د رحمت د کورنۍ له شکایت وروسته، شکیلا او یو بل سړی په کابل کې د طالبانو له لوري نیول شوي وو، خو د کابل د طالبانو د ولایتي محکمې د پرېکړې له مخې، دواړه وروسته بېګناه وپېژندل شول او خوشې شول.
له خوشې کېدو وروسته شکیلا او رحمت میرامور ولسوالۍ ته ستانه شوي وو، چې د دواړو کورنۍ په کې ژوند کوي.
د سرچینو په وینا، شکیلا او رحمت خپلوي هم لرله او شاوخوا لس کاله مخکې یې واده کړی و. رحمت د امریکا د متحده ایالتونو د استوګنې اجازه لري او د همدې کورنۍ دعوې د تعقیب لپاره افغانستان ته راستون شوی و.
سرچینې وایي، شکیلا له میرامور ته له ستنېدو وروسته د خپلې مهریې د ترلاسه کولو لپاره د ولسوالۍ په مرکز کې قضیه ثبت کړې وه. د قضايي پړاوونو له بشپړېدو وروسته، ټاکل شوې وه چې نن د ابتدائیه محکمې قاضي په دې قضیه کې پرېکړه وکړي.
اوس مهال د شکیلا جسد د طبي معاینې او ثبت لپاره د اسکان سیمهییزې روغتیايي مرکز ته انتقال شوی او کورنۍ یې د میرامور ولسوالۍ له مرکز سره په اړیکه کې ده، څو د پېښې د څېړنې لپاره یو پلاوی ورولېږل شي.
طالبانو تر اوسه د دې پېښې او د شکمن کس د برخلیک په اړه څه نه دي ویلي.
