د افغانستان د مقاومت ملي جبهې مشر احمد مسعود د طالبانو په منځ کې د «سوله غوښتونکي» او «جګړه غوښتونکي» جریانونو په اړه د راپورونو په اشاره ویلي، که په رښتیا هم په دې ډله کې د سولې غوښتونکی جریان شتون ولري، باید نوښت په خپل لاس کې واخلي.
مسعود له ایراف ټلویزیون سره په خبرو کې ویلي چې د افغانستان د سیاسي او جهادي مشرانو، له حمدشاه مسعود څخه تر برهانالدین رباني پورې، لومړنی پیغام د جګړې نه، بلکې د سولې پیغام و.
هغه ویلي، له دې سره سره، داسې ښکاري چې اوس مهال د طالبانو په جوړښت کې کنټرول، نوښت او د پالیسۍ جوړولو واک د هغو جریانونو په لاس کې دی چې دی یې «جګړه غوښتونکي» بولي.
د مقاومت ملي جبهې مشر زیاته کړې چې تر اوسه یې په طالبانو کې د سولې غوښتونکی جریان نه دی لیدلی او د داسې یوه جریان پر شتون شک لري؛ خو که په رښتیا داسې یوه ډله موجوده وي، باید د افغانستان د خلکو اراده ومني او خپل مشروعیت له داخل افغانستان څخه ترلاسه کړي.
مسعود ټینګار کړی چې جګړه د افغانستان د ستونزې حل نه ګڼي او څو ځله یې د سیاسي حل د موندلو پر اړتیا ټینګار کړی دی.
هغه ویلي چې د طالبانو مخالفو جریانونو د افغانستان د راتلونکي په اړه یو شمېر ګډو توافقونو ته رسېدلي او هڅه کوي د هېواد د سیاسي مشروعیت لپاره د زمینې برابرولو په موخه یوه ګډه نقشه جوړه کړي.
د مسعود په وینا، د طالبانو د مخالفینو هدف د دې ډلې بشپړ له منځه وړل یا د یوه ځانګړي کس او جریان له خوا د واک ترلاسه کول نه دي؛ بلکې هدف یې د داسې یوه مشروع نظام رامنځته کول دي چې د هغه د ډول په اړه د افغانستان خلک خپله پرېکړه وکړي.
هغه زیاته کړې چې د داسې نظام تر جوړېدو پورې به د طالبانو مخالف جریانونه هڅه وکړي چې په یوه ګډ صف کې پاتې شي.
د مقاومت ملي جبهې مشر هم طالبان د خبرو او له خلکو سره د مقابلې ترمنځ انتخاب ته وربولي او وایي، دا ډله باید د خبرو مېز ته حاضر شي او د یوه ټولشموله حکومت د جوړولو لپاره خبرې وکړي.
مسعود خبرداری ورکړی چې که طالبان دا کار ونه کړي، له «د افغانستان د خلکو له ارادې او قهر» سره به مخ شي.
هغه ویلي چې د طالبانو مخالف جریانونه د یوه آزاد، آباد او خپلواک افغانستان غوښتونکي دي؛ داسې هېواد چې په هغه کې واک مشروعیت ولري او دغه مشروعیت د خلکو له ارادې سرچینه واخلي.
مسعود د طالبانو د مخالفو جریانونو ترمنځ د وروستي هدف په اړه د جدي اختلاف شتون هم رد کړی او ویلي یې دي چې د افغانستان د سیاسي راتلونکي په اړه د خلکو د پرېکړې لپاره د زمینې برابرول د دغو جریانونو ګډ هدف دی.
هغه په بله برخه کې ویلي چې په واک کې د طالبانو حضور دایمي نه دی او ټینګار یې کړی: «طالبان د افغانستان د تاریخ پای نه دي.»
د مقاومت ملي جبهې مشر په پای کې ویلي چې طالبان به یا د خلکو له لارې، یا د سیمهییزو، نړیوالو او میداني فشارونو په پایله کې، اړ شي چې د افغانستان د خلکو اراده ومني او یا له واک څخه ووځي.
