د سویلي افریقا ولسمشر سیریل رامافوسا له ملالې یوسفزۍ، د نجونو د زدهکړو له فعالې، او یو شمېر افغان ښځینه فعالانو سره لیدلي او په افغانستان کې د ښځو د حقونو د ملاتړ او هغه څه پر وړاندې د مبارزې پر اړتیا یې ټینګار کړی چې «جنسیتي اپارتاید» بلل کېږي.
د سویلي افریقا حکومت د یکشنبې په ورځ، د زمري پر ۱۸مه، ویلي چې افغان ښځو په دې لیدنه کې له سویلي افریقا غوښتي چې په افغانستان کې د جنسیتي تبعیض پر وړاندې د نړیوالو هڅو ملاتړ وکړي.
د حکومت په خبرپاڼه کې راغلي چې ګډونوالو ټینګار کړی، د افغان ښځو غږ باید د عدالت او حسابورکونې د تأمین لپاره د نړیوالو هڅو په مرکز کې وي.
ملالې یوسفزۍ له دې لیدنې وروسته په ټولنیزه شبکه اېکس کې د رامافوسا له «همدردۍ» او له افغان ښځو سره د هغه له صمیمانه تعامل څخه مننه کړې ده.
هغې ویلي چې افغانستان د طالبانو د واکمنۍ پنځم کال ته داخلېږي؛ هغه دوره چې د نوموړې په وینا، د ښځو پر حقونو له پراخو محدودیتونو او د نجونو له زدهکړو څخه له محرومیت سره مل ده.
یوسفزۍ همداراز ټینګار کړی چې د عدالت د تأمین او په نړۍ کې د «جنسیتي اپارتاید» د عادي کېدو د مخنیوي لپاره د سویلي افریقا همکاري مهمه ده.
دغه دریځ د نژادي اپارتاید پر وړاندې د سویلي افریقا له تاریخي مبارزې سره تړاو لري. د دغه هېواد چارواکو تر دې وړاندې هم ویلي چې په سویلي افریقا کې د اپارتاید د پای تجربه ښيي چې کورنی مقاومت د نړیوالې همکارۍ ترڅنګ کولای شي د تبعیضي نظامونو پر وړاندې په مبارزه کې مهم رول ولري.
په ملګرو ملتونو کې د بشري حقونو شورا لپاره د سویلي افریقا استازي هم تر دې وړاندې ویلي وو چې هېواد یې د جنسیتي اپارتاید پر وړاندې د مبارزو ملاتړ کوي او باید د افغان نجونو او ښځو د اساسي حقونو د محرومیت پر وړاندې چوپتیا غوره نه شي.
په لندن کې د سویلي افریقا سفیر هم مخکې د طالبانو سیاستونه د ښځو پر وړاندې «جنسیتي اپارتاید» او د بشریت پر ضد جنایت بللي او ویلي یې وو چې د دغه هېواد تجربه کولای شي د افغانستان د خلکو لپاره د مبارزې الهام وي.
د رامافوسا لیدنه له ملالې او افغان ښځینه فعالانو سره په داسې وخت کې ترسره کېږي چې د جنسیتي اپارتاید د یوه نړیوال جرم په توګه د په رسمیت پېژندلو او پر طالبانو د فشار د زیاتولو هڅې روانې دي، څو د ښځو او نجونو پر وړاندې محدودیتونه لغوه کړي.
