د پاکستان حکومت د نویو مقرراتو په پلي کولو سره د نړیوالو رسنیو پر فعالیتونو تازه محدودیتونه لګولي؛ هغه اقدام چې د مطبوعاتو د ازادۍ د ملاتړو بنسټونو او خبریالانو له پراخو نیوکو سره مخ شوی دی.
د نویو لارښوونو له مخې، د بهرنیو رسنیو خبریالان او همکاران باید له اسلاماباد، کراچۍ او لاهور څخه بهر هرې سیمې ته د راپور جوړولو لپاره تر سفر مخکې د «د اعتراض نشتون سند» په نوم رسمي اجازه ترلاسه کړي.
منتقدان وایي، دا مقررات د نړیوالو رسنیو لاسرسی د پاکستان بېلابېلو سیمو ته د حکومتي چارواکو له پرېکړې سره تړي او کولی شي خپلواک راپور ورکول له جدي ستونزو سره مخ کړي.
خو پاکستاني چارواکي ټینګار کوي چې د دغو لارښوونو موخه د رسنیو محدودول نه دي، بلکې د بهرنیو خبریالانو د فعالیتونو لپاره د همغږۍ او اداري اسانتیاوو رامنځته کول دي.
د رسنیو کارپوهانو او د خبریالانو د حقونو ملاتړو بنسټونو خبرداری ورکړی چې د اجازې د ورکړې په بهیر کې ابهام او د «امنیت» یا «عامه نظم» په څېر عمومي دلایلو له مخې د خبریالانو د اعتبارنامو د لغوه کېدو امکان، د قوانینو د سلیقوي تفسیر او د رسنیو د ازادۍ د محدودېدو زمینه برابروي.
پاکستان د مطبوعاتو د ازادۍ په وروستي نړیوال شاخص کې د ۱۸۰ هېوادونو له ډلې په ۱۵۳م ځای کې راغلی، هغه موضوع چې په دې هېواد کې د رسنیو د ازادۍ په اړه اندېښنې لا زیاتې کړې دي.
