د اروپا د ځنګلي اورونو د معلوماتي سیستم د شمېرو له مخې، په تېرو اوو میاشتو کې په اروپایي ټولنه کې د سختې تودوخې، وچکالۍ او بادونو شدت د تېرو شلو کلونو د همدې مودې د اوسط په پرتله ۴۳ سلنه زیات شوی دی. کارپوهان وایي، د فوسیلي سونتوکو له امله رامنځته شوې ککړتیا او اقلیمي بدلونونو د دې وضعیت په سختېدو کې مهم رول لوبولی دی.
د یاد سیستم د معلوماتو له مخې، د روان کال له پیل راهیسې شاوخوا ۴۳۵ زره هکټاره ځمکه په اروپا کې د اورونو ښکار شوې ده؛ دا اندازه د وروستیو کلونو د اوسط په پرتله نږدې درې برابره زیاته ده.
دا زیانونه د څه باندې ۱۴۰۰ بېلابېلو ځنګلي اورونو په پایله کې رامنځته شوي، چې شمېر یې د پخوانیو کلونو د اوسط په پرتله له دوه برابرو ډېر دی.
شمېرې ښيي چې یوازې په فرانسه کې تر اوسه ۹۱ زره هکټاره ځمکه سوځېدلې او دغه هېواد، سره له دې چې د اوړي شاوخوا یوه میاشت لا پاتې ده، د ځنګلي اورونو کلنی ریکارډ مات کړی دی.
هسپانیه، چې سږکال یې د خپل تاریخ تر ټولو لوی ثبت شوی ځنګلي اور تجربه کړی، تر اوسه نږدې ۲۰۷ زره هکټاره ځمکه له لاسه ورکړې؛ دا کچه د تېر کال د همدې مودې د اوسط په پرتله نږدې پنځه برابره لوړه ده.
په همدې حال کې، د پرتګال پولې ته نږدې د یوه نوي اور له امله چارواکي اړ شول شاوخوا ۶۰۰ کسان له خطرناکو سیمو وباسي. د اروپایي ټولنې د بحران د مدیریت همغږۍ مرکز خبرداری ورکړی چې په راتلونکو اوونیو کې به وضعیت لا سخت شي، ځکه اورونه په ایټالیا او یونان کې هم د پراخېدو په حال کې دي.
کارپوهان اقلیمي بدلون د دغو اورونو اصلي لامل بولي. د هغوی په وینا، پرلهپسې د تودوخې څپو د نباتاتو پوښښ وچ کړی او د اور د چټک خپرېدو لپاره یې مناسب شرایط برابر کړي دي.
څېړونکي وایي، په اروپا کې د ځنګلي اورونو بڼه بدلېږي؛ د اورونو شمېر ښايي کم وي، خو پراخوالی او شدت یې ډېر شوی دی. له همدې امله، هغه اورونه چې په لومړیو ساعتونو کې مهار نه شي، په چټکۍ سره په لویو او کنټرول نه کېدونکو اورونو بدلېږي.
هواپوه خوسې میګیل وینیاس ویلي، سخته تودوخه، ډېره وچکالي او قوي بادونه د ځنګلي اورونو شدت زیاتوي او له پیل وروسته یې ژر له کنټروله باسي.
اټکلونه ښيي چې د تودوخې څپو تر اوسه لږ تر لږه ۱۰ زره کسان مړه کړي او د اروپا د غلو دانو د تولید سکتور ته یې شاوخوا دوه میلیارده یورو زیان اړولی دی.
