یوناني پولیسو اعلان کړی چې د سکاټلنډ د ۳۸ کلنې مېرمنې، الیزابت جېن راس، د مړینې د قضیې په تړاو یې یو ۲۶ کلن افغان نیولی دی. د دغې مېرمنې جسد څه موده وړاندې د آتن ښار په یوه متروک ودانۍ کې د سفر په یوه بکس کې موندل شوی و.
د پولیسو په وینا، نیول شوی کس د غیرعمد قتل، غلا او د وسلو د لېږد د قوانینو د سرغړونې په شک تر پلټنو لاندې دی.
د راپورونو له مخې، د څار کمرې ښيي چې شکمن د اسد د ۲۷مې نېټې پر ورځ د قرباني جسد په یوه سفري بکس کې هغه ځای ته لېږدولی چې وروسته پکې موندل شوی او له هغې وروسته یې د نوموړې بانکي کارتونه د پیسو د ایستلو لپاره کارولي دي.
پولیس وایي، دغه افغان منلې چې جسد یې لېږدولی، خو په قتل کې یې هر ډول لاس لرل رد کړي او ادعا یې کړې چې ښځه یې له وړاندې مړه موندلې وه. یوناني چارواکي وایي، دا ادعا لا هم تر څېړنې لاندې ده.
د شکمن د استوګنې ځای د پلټنې پر مهال یوه جعلي ټوپک او یو چاقو هم موندل شوي، له همدې امله د وسلو د قانون د سرغړونې تور هم د هغه په دوسیه کې شامل شوی دی.
د پلټونکو په وینا، د قربانۍ ګرځنده ټیلیفون د احتمالي مړینې له وخت وروسته هم فعال پاتې شوی او د هغې د کورنۍ او خپلو اشناوو ته پیغامونه لېږل شوي، څو داسې وښيي چې نوموړې لا ژوندۍ ده. پولیس دا احتمال هم څېړي چې ښايي دغه پیغامونه شکمن استولي وي.
یوناني چارواکو ویلي چې د مړینې دقیق لامل لا نه دی معلوم او د عدلي طب او زهر پېژندنې د ازموینو له بشپړېدو وروسته به وروستۍ پایلې اعلان شي.
