د اسرائیل لومړی وزیر بنیامین نتانیاهو ویلي چې په سپینه ماڼۍ کې له امریکا د ولسمشر ډونالډ ټرمپ سره په خپلې راتلونکې لیدنه کې به د ټولو مهمو موضوعاتو، په ځانګړي ډول د ایران، په اړه خبرې وکړي.
نتانیاهو د اسرائیل د کابینې د اوونیزې غونډې په پیل کې وویل چې ایران به د دې لیدنې له اصلي محورونو څخه وي، خو د خبرو د اجنډا په اړه یې نور جزییات وړاندې نه کړل.
هغه همدارنګه وویل چې د امریکا د بهرنیو چارو وزیر مارکو روبیو په یوه ټلیفوني اړیکه کې ورته ویلي، واشنګټن غواړي د نړیوالې جزایي محکمې پر وړاندې اقدام وکړي. د نتانیاهو په وینا، روبیو دغه محکمه د عدالت او د خپلواکو او ډیموکراتیکو هېوادونو د حاکمیتي صلاحیتونو لپاره ګواښ بللی دی.
تر دې وړاندې د اسرائیل ۱۲م ټلوېزیوني کانال راپور ورکړی و چې ټاکل شوې نتانیاهو د زمري په شپږمه، د سهشنبې په ورځ، په سپینه ماڼۍ کې له ډونالډ ټرمپ سره وګوري. د راپور له مخې، نوموړی به په دې لیدنه کې د هغه څه په اړه نوي معلومات وړاندې کړي چې اسرائیل یې د ایران د پوځي وړتیاوو او اټومي پروګرام د بیا رغونې هڅې بولي.
د ایران اسلامي جمهوریت بیا بیا ټینګار کړی چې اټومي پروګرام یې سولهییزه موخه لري او د اټومي وسلو د جوړولو هر ډول هڅې ردوي. ایراني چارواکو تر اوسه د ټرمپ او نتانیاهو د احتمالي لیدنې د راپور شوي محتوا په اړه رسمي غبرګون نه دی ښودلی.
