د افغانستان پخواني ولسمشر اشرف غني د نورستان د مرګونو سېلابونو د مدیریت په اړه پر طالبانو نیوکه کړې او ویلي یې دي چې واکمنه اداره باید خلکو ته روښانه کړي چې ولې ورته طبیعي پېښې بیا ـ بیا تکراریږي او د زیانونو د کمولو لپاره ولې لازم چمتووالی نه و نیول شوی.
اشرف غني په یوه پیغام کې د نورستان د سېلابونو له قربانیانو او د هغوی له کورنیو سره خواخوږي څرګنده کړه او ویې ویل، خلک حق لري له واکمنو وپوښتي چې د تېرې مودې د طبیعي پېښو، په ځانګړي ډول د کونړ له سېلابونو وروسته، د ورته پېښو د مخنیوي او د زیانونو د راکمولو لپاره کوم عملي ګامونه پورته شوي دي.
هغه زیاته کړه: «ښايي هغه کسان چې خلکو ته د ملت پر ځای د رعیت په سترګه ګوري، دا ډول پوښتنې د خلکو له واکه پورته وبولي، خو دا پوښتنې شته او ځواب ته اړتیا لري.»
د دوشنبې په ورځ د نورستان په ولایت کې مرګونو سېلابونو پراخ بشري او مالي زیانونه واړول. د سیمهییزو راپورونو له مخې، په وژل شویو کې د طالبانو یو شمېر سیمهییز چارواکي، د پارون ښاروال په ګډون، هم شامل دي. دغه راز سلګونه کورونه، عامه زیربناوې او کرنیزې ځمکې هم زیانمنې شوې دي.
اشرف غني د پارون سېلابونه، د کونړ له زلزلو او سېلابونو وروسته، د ختیځ افغانستان له سترو طبیعي پېښو څخه وبلل او له هېوادوالو، سوداګرو او بهر مېشتو افغانانو یې وغوښتل چې د زیانمنو شویو کورنیو د ملاتړ لپاره مرسته وکړي.
پخواني ولسمشر د اقلیمي بدلون او د ځنګلونو پراخې وهل د ویجاړوونکو سېلابونو له اصلي لاملونو څخه وبلل او خبرداری یې ورکړ چې په کونړ او نورستان کې د ونو پرې کېدل لا هم دوام لري. هغه ادعا وکړه چې د لرګیو قاچاقبران د «کورني مافیا» په همکارۍ د ختیځو ولایتونو ځنګلونه له منځه وړي، په داسې حال کې چې د هغه په وینا، پاکستان د ځنګلونو د پراختیا پراخ پروګرامونه پلي کړي دي.
اشرف غني د نورستان وروستي سېلابونه د افغانستان د راتلونکي لپاره «د خطر زنګ» وباله او د ځنګلونو د پرې کېدو د مخنیوي، د پراخو ځنګلکرنې پروګرامونو د پلي کېدو او د طبیعي پېښو پر وړاندې د مخنیوي د تدابیرو د پیاوړتیا غوښتنه یې وکړه.
طالبانو تر اوسه د اشرف غني د دغو څرګندونو او نیوکو په اړه رسمي غبرګون نه دی ښودلی.
