د اروپايي ټولنې د پولیسو ادارې (یوروپل) اعلان کړی چې د بلغاریا او صربستان له چارواکو سره په ګډو عملیاتو کې یې د انسان قاچاق یوه منظمه شبکه له منځه وړې، چې د ترکیې او بالکان له لارې یې لوېدیځې اروپا ته د افغان کډوالو د لېږد تور پرې لګېدلی و.
د یوروپل د معلوماتو له مخې، د عملیاتو پر مهال پنځه کسان، چې د دې شبکې یو مهم مشر او دوه پولیس افسران هم پکې شامل دي، نیول شوي دي. ویل کېږي چې دې شبکې خپل فعالیت په ۲۰۲۵ کال کې پیل کړی و او افغانان یې د ترکیې، بلغاریا او صربستان له لارې اروپايي هېوادونو ته لېږدول.
یوروپل ویلي، د پلټنو پر مهال درې هغه موټر هم ضبط شوي چې د کډوالو د لېږد لپاره کارېدل. همدارنګه وسلې، مهمات، یو مخابراتي دستګاه، څو ګرځنده ټیلیفونونه، پنځه زره او ۷۰۰ یورو نغدې پیسې او ۴۰ زره صربي دیناره هم نیول شوي دي.
د دې ادارې په وینا، کډوالو به د بلغاریا له پولې تر صربستان پورې د لېږد لپاره شاوخوا زر یورو او د صربستان له پولې تر پولنډ پورې د سفر لپاره شاوخوا ۳۰۰ یورو نور ورکول. د راپور له مخې، د دغو پیسو ډېره برخه د حوالې له سیسټم څخه لېږدول کېده.
یوروپل د انسان قاچاق د اروپايي ټولنې پر وړاندې د منظم جرمونو له مهمو ګواښونو څخه بللی او ټینګار یې کړی چې د دغو شبکو پر وړاندې اغېزمنه مبارزه یوازې د سیمې د هېوادونو او نړیوالو ادارو د نږدې همکارۍ له لارې ممکنه ده.
