د ترکیې د بهرنیو چارو وزیر هاکان فیدان د اسرائیل د لومړي وزیر بنیامین نتانیاهو سیاستونه د اسرائیل، منځني ختیځ او نړیوال امنیت لپاره ګواښ بللي او ویلي یې دي چې د تلابیب اوسنی دریځ د سیمې بېثباتۍ ته لاره هواروي.
فیدان د ابوظبۍ مېشتې «نشنل» ورځپاڼې سره په مرکه کې وویل، د نتانیاهو د حکومت پالیسۍ یوازې د ترکیې لپاره ستونزه نه ده، بلکې خپله اسرائیل، سیمهییز ثبات او نړیوال امنیت هم تر اغېز لاندې راولي.
د ترکیې د بهرنیو چارو وزیر د انقرې او تلابیب ترمنځ د لفظي ترینګلتیا د پوځي شخړې پر امکان هم خبرې وکړې او ویې ویل، د ترکیې ولسمشر رجب طیب اردوغان «د سولې او تدبیر مشر» دی او اجازه به ورنه کړي چې هېواد یې د پاروونکو اقداماتو پر لور ولاړ شي.
هغه همدارنګه وویل، اروپايي مشران د اسرائیل د سیاستونو له احتمالي خطرونو خبر دي، خو تر اوسه یې د دې وضعیت د مهار لپاره کومه روښانه تګلاره نه ده موندلې. فیدان خبرداری ورکړ چې په سوریه کې د روانو تحولاتو د ګډوډولو هر ډول هڅه به د ټولې سیمې لپاره پراخې پایلې ولري.
د ترکیې د بهرنیو چارو وزیر د غزې جګړې ته په اشارې وویل، د خلیج فارس وروستیو تحولاتو د دې جګړې پر نړیوال تمرکز اغېز کړی دی. هغه د نړیوالې ټولنې غوښتنه وکړه چې پر اسرائیل فشار زیات کړي، څو فلسطینیانو ته د بشري مرستو د رسولو زمینه پراخه شي.
فیدان د سیمې په کړکېچونو کې د ترکیې د منځګړیتوب رول ته هم اشاره وکړه او ویې ویل، انقره د سیمې د لوبغاړو او د شخړو د پېچلتیاوو د ښه درک له امله کولای شي د تاوتریخوالي په کمولو کې مهم رول ولوبوي.
هغه د خپلو څرګندونو په پای کې ټینګار وکړ چې ټول هېوادونه باید د یو بل ملي حاکمیت او ځمکنۍ بشپړتیا ته درناوی وکړي. فیدان وویل، ایران په سیمه کې د نیابتي ډلو حضور د خپلې امنیتي ستراتیژۍ برخه ګڼي، په داسې حال کې چې اسرائیل هم د ځینو سیمو اشغال د امنیتي دلایلو پر بنسټ توجیه کوي.
