د ایران دولتي خبري اژانس (ایرنا) راپور ورکړی چې د پنجشنبې په ماښام د سیستان او بلوچستان ولایت د کنارک په سیمه کې د سمندري ځواکونو تأسیسات د «دښمن» له لوري د دوو بریدونو هدف ګرځېدلي دي. هممهاله، په بوشهر کې یوه سیمهییز چارواکي هم ویلي چې د ښار په څنډه کې یو پوځي مرکز د «امریکا او اسرائیل» تر برید لاندې راغلی دی.
د کنارک ولسوال محمد یونس حقاني ایرنا ته ویلي، امنیتي او ژغورنې ځواکونه د پېښې ځای ته رسېدلي او د برید د څرنګوالي او ابعادو په اړه پلټنې روانې دي. هغه د احتمالي مرګژوبلې په اړه څه نه دي ویلي.
په ورته وخت کې، د بوشهر د سیاسي او امنیتي چارو مرستیال احسان جهانیان د بوشهر ښار په څنډه کې پر یوه پوځي مرکز د ادعا شوي برید خبر تایید کړی او ویلي یې دي چې تر اوسه د انساني تلفاتو کوم راپور نه دی ترلاسه شوی. هغه دا ادعا هم کړې چې د ایران هوايي دفاع په خپل وخت غبرګون ښودلی او د امریکایي بېپیلوټه الوتکو د احتمالي عملیاتو مخه یې نیولې ده.
دا راپورونه په داسې حال کې خپاره شوي چې یو شمېر نورو ایراني رسنیو هم د کرمان، بوشهر، عسلویه او بندرعباس په ګډون د ایران په څو ښارونو کې د چاودنو د غږونو د اورېدو خبر ورکړی و.
خو د ایران دولتي راډیو او ټلوېزیون بیا د بندرعباس، قشم، سیریک او جاسک په سیمو کې د هر ډول چاودنې راپورونه رد کړي او ویلي یې دي چې تر دې دمه په دغو سیمو کې هېڅ چاودنه نه ده ثبت شوې.
له بلې خوا، د سياېناېن د راپور له مخې، یو امریکایي چارواکي ویلي چې د امریکا پوځ دا مهال په ایران کې هېڅ ډول پوځي عملیات نه ترسره کوي.
د دغو متضادو راپورونو له امله، د پېښو دقیق څرنګوالی لا هم روښانه نه دی او د ادعا شویو بریدونو په اړه خپلواکه ارزونه تر اوسه نه ده شوې.
